كەشە، 5 ناۋرىز كۇنى قىرعىزستاندا ءداستۇرلى اق قالپاق جانە ۇلتتىق كيىم كۇنى اتالىپ ءوتتى. بۇل مەرەكە 2011 جىلى بەكىتىلىپ، جىل سايىن كەڭ كولەمدە تويلانىپ كەلەدى، دەپ حابارلايدى "ادىرنا" ۇلتتىق پورتالى سينحۋاعا سىلتەپ.
قىرعىزستاننىڭ مەملەكەتتىك حاتشىسى سۇيىنبەك قاسمامبەتوۆ بارلىق ازاماتتى مەرەكەمەن قۇتتىقتاپ، ۇلتتىق كيىمنىڭ حالىقتىڭ مادەنيەتى مەن تاريحىنىڭ اجىراماس بولىگى ەكەنىن اتاپ ءوتتى.
"اق قالپاقتان باستاپ ءبىزدىڭ ۇلتتىق كيىمىمىز حالقىمىزدىڭ تاريحىمەن تىعىز بايلانىسىپ، مادەني مۇرانىڭ ماڭىزدى ەلەمەنتى رەتىندە ساقتالىپ كەلەدى. ءبىزدىڭ باستى مىندەتىمىز – اتا-بابامىزدىڭ مۇراسىن، ءتىلىن، ءداستۇرىن كەيىنگى ۇرپاققا جەتكىزۋ", – دەدى ول.
بۇل كۇنى ەلدەگى مەكتەپتەردە، ۋنيۆەرسيتەتتەردە جانە مەملەكەتتىك مەكەمەلەردە ۇلتتىق كيىمدى ناسيحاتتايتىن ءتۇرلى شارالار ۇيىمداستىرىلدى. سونىمەن قاتار، قالالار مەن اۋىلداردا فلەشموبتار، ۇلتتىق كيىم بايقاۋلارى ءوتتى. ءداستۇر بويىنشا، ەر ادامدار اق قالپاق كيىپ، ۇلتتىق مۇرانى دارىپتەدى.
ايتا كەتەيىك، 2019 جىلى اق قالپاق يۋنەسكو-نىڭ ماتەريالدىق ەمەس مادەني مۇرا تىزىمىنە ەنگىزىلگەن.
