قازاقستاننىڭ ەكس-پرەزيدەنتى نۇرسۇلتان نازارباەۆتىڭ كۇيەۋبالاسى، كاسىپكەر تيمۋر قۇلىباەۆ ۇلىبريتانيا حانزاداسى ەندريۋدەن ءزاۋلىم ءۇيدى 15 ميلليون فۋنت ستەرلينگكە ساتىپ العان. بۇل سۇرالعان باعادان 3 ميلليون فۋنتقا قىمبات. BBC زەرتتەۋىندە مامىلە ءۇشىن تولەنگەن قاراجاتتىڭ ءبىر بولىگى بۇرىن حالىقارالىق جەمقورلىق جانجالىندا اتالعان وفشورلىق كومپانيا ارقىلى وتكەندىگى ايتىلعان، دەپ حابارلايدى "ادىرنا" ۇلتتىق پورتالى.
BBC دەرەگىنشە، سارايدى ساتىپ الۋ ءۇشىن جۇمسالعان قاراجاتتىڭ ءبىر بولىگى Enviro Pacific Investments كومپانياسى ۇسىنعان نەسيە ارقىلى جابىلعان. كەيىن يتاليا پروكۋراتۋراسى اتالعان كومپانيانىڭ قارجىسى پاراقورلىق سحەمالارى ارقىلى الىنعان بولۋى مۇمكىن دەگەن تۇجىرىم جاساعان.
يتاليالىق تەرگەۋ ماتەريالدارىندا Enviro Pacific كومپانياسىنا قاراجات Aventall اتتى قۇرىلىم ارقىلى تۇسكەنى كورسەتىلەدى. بۇل كومپانيانى يتاليالىق كاسىپكەر اگوستينو بيانكي مەن «دەلدال» رەتىندە تانىلعان ماسسيمو گۋيدوتتي باسقارعان. تەرگەۋ بارىسىندا بيانكي سوتتا قۇلىباەۆ پەن باسقا دا قازاقستاندىق شەنەۋنىكتەرگە مۇناي كەلىسىمشارتتارى ءۇشىن پارا بەرگەنىن مويىنداعان.
«2007 جىلى جىلجىمايتىن مۇلىككە قاتىستى مامىلە Unity Assets Corporation وفشورى ارقىلى راسىمدەلدى. قۇجات جۇزىندە ول قۇلىباەۆقا تيەسىلى بولعان. ساتىپ الۋشىنىڭ ەسىمىن بۋكينگەم سارايى دا، ەندريۋدىڭ ءوزى دە جاريالامادى. بۇل ونىڭ مەملەكەتتىك قىزمەتكەر مارتەبەسىنە جانە سول كەزدەگى قازاقستان پرەزيدەنتى نۇرسۇلتان نازارباەۆپەن تۋىستىق بايلانىسىنا قاراماستان جاسالدى»، - دەلىنگەن جاريالانىمدا.
BBC ساۋالناما جۇرگىزگەن زاڭگەرلەر «قىزىل جالاۋشالارعا» نازار اۋدارعان. ولاردىڭ قاتارىندا وفشورلىق سحەمالار، قارجىلاندىرۋ كوزدەرىنىڭ اشىق ەمەستىگى، ساتىپ الۋ باعاسىنىڭ تىم جوعارى بولۋى جانە اقشانى جىلىستاتۋ بەلگىلەرى بار. ال قۇلىباەۆتىڭ ادۆوكاتتارى ول نەسيەنى پايىزىمەن تولىق وتەگەنىن، زاڭ بۇزباعانىن جانە ەشبىر تەرگەۋگە قاتىسى بولماعانىن مالىمدەدى.
قۇلىباەۆ ساتىپ العان Sunninghill Park ءزاۋلىم ءۇيى ۇزاق ۋاقىت بوس تۇرعان، كەيىن مۇلدە بۇزىلعان. ونىڭ ورنىنا جاڭا ءۇي سالىنعانىمەن، ول دا پايدالانىلماعان.
ايتا كەتسەك، قۇلىباەۆتقا ءزاۋلىم ءۇيىن ساتقان حانزادا ەندريۋ جاقىندا بارلىق كورولدىك اتاقتارىنان ايىرىلىپ، رەسمي رەزيدەنتسيادان كەتتى. بۇل ونىڭ دجەففري ەپشتەينمەن بايلانىسىنا جانە سەكسۋالدىق قىسىم كورسەتۋ ايىپتارىنا قاتىستى داۋدان كەيىن بولدى. كورول چارلز III باۋىرىن رەزيدەنتسيادان شىعارۋ تۋرالى شەشىمدى ءوزى قابىلداپ، ونى بارلىق سالتاناتتى مىندەتتەردەن شەتتەتتى.
