Қырғыз халқы ақ қалпақ және ұлттық киім күнін тойлады

Кеше, 5 наурыз күні Қырғызстанда дәстүрлі Ақ қалпақ және ұлттық киім күні аталып өтті. Бұл мереке 2011 жылы бекітіліп, жыл сайын кең көлемде тойланып келеді, деп хабарлайды "Адырна" ұлттық порталы Синьхуаға сілтеп. Қырғызстанның мемлекеттік хатшысы Сүйінбек Қасмамбетов барлық азаматты мерекемен құттықтап, ұлттық киімнің халықтың мәдениеті мен тарихының ажырамас бөлігі екенін атап өтті. "Ақ қалпақтан бастап біздің ұлттық киіміміз халқымыздың тарихымен тығыз байланысып, мәдени мұраның маңызды элементі ретінде сақталып келеді. Біздің басты міндетіміз – ата-бабамыздың мұрасын, тілін, дәстүрін кейінгі ұрпаққа жеткізу", – деді ол. Бұл күні елдегі мектептерде, университеттерде және мемлекеттік мекемелерде ұлттық киімді насихаттайтын түрлі шаралар ұйымдастырылды. Сонымен қатар, қалалар мен ауылдарда флешмобтар, ұлттық киім байқаулары өтті. Дәстүр бойынша, ер адамдар ақ қалпақ киіп, ұлттық мұраны дәріптеді. Айта кетейік, 2019 жылы ақ қалпақ ЮНЕСКО-ның материалдық емес мәдени мұра тізіміне енгізілген.