موڭعوليانىڭ مينيسترلەر كابينەتىنىڭ كەزەكتى وتىرىسىندا ۇلى موڭعول يمپەرياسىنىڭ قۇرىلعانىنا 820 جىل تولۋىنا وراي وتەتىن سالتاناتتى ءىس-شارالاردى ۇيىمداستىرۋ جانە ۇيلەستىرۋ ءۇشىن ارنايى جۇمىس توبى بەكىتىلدى. بۇل باستاما تاريحي مۇرانى جاڭعىرتۋعا، ۇلتتىق بىرەگەيلىكتى نىعايتۋعا جانە ەلدىڭ مادەني قۇندىلىقتارىن كەڭىنەن تانىتۋعا باعىتتالعان، دەپ حابارلايدى “ادىرنا” پورتالى مontsame سايتىنا سىلتەپ.
جۇمىس توبىنىڭ نەگىزگى مىندەتتەرى قاتارىندا ۇلى موڭعول يمپەرياسىنىڭ باي تاريحىن حالىق اراسىندا كەڭىنەن ناسيحاتتاۋ، بارلىق جاس ساناتتارىنا ارنالعان تاقىرىپتىق مادەني-اعارتۋشىلىق ءىس-شارالاردى ۇيىمداستىرۋ، مەرەيتوي يدەيالارىن ۇلتتىق «ناادام» مەرەكەسىنىڭ باعدارلاماسىنا ەنگىزۋ، سونداي-اق يمپەريانىڭ تاريحى مەن مادەنيەتىن شەتەلدە ديپلوماتيالىق ميسسيالار ارقىلى ىلگەرىلەتۋ كوزدەلگەن.
اتالعان جۇمىس توبىنا موڭعوليا پرەمەر-ءمينيسترىنىڭ ورىنباسارى، «ناادام» ۇلتتىق مەرەكەسىنىڭ ۇيىمداستىرۋ كوميتەتىنىڭ توراعاسى حاسسۋرين گانحۋياگ جەتەكشىلىك ەتەدى. ونىڭ قۇرامىنا مەملەكەتتىك ۇلى حۋرالدىڭ وكىلدەرى، ۇكىمەت مۇشەلەرى، مينيسترلىكتەر مەن ۆەدومستۆولاردىڭ، سونداي-اق باسقا دا مەملەكەتتىك ۇيىمداردىڭ باسشىلارى ەنگەن.
بۇل مەرەيتويلىق ءىس-شارالار ۇلى موڭعول يمپەرياسىنىڭ الەم تاريحىنداعى ورنىن ايقىنداپ قانا قويماي، جاس ۇرپاققا تاريحي سانانى قالىپتاستىرۋعا جانە حالىقارالىق دەڭگەيدە ەلدىڭ مادەني بەدەلىن ارتتىرۋعا ىقپال ەتەدى.
