فرانتسيا پرەزيدەنتى ەممانۋەل ماكرون ەۋرووداق ۋكرايناعا جۇزدەگەن ميلليارد ەۋرو كولەمىندە قارجىلاي كومەك كورسەتۋ مۇمكىندىگىن قاراستىرىپ جاتقانىن مالىمدەدى، دەپ حابارلايدى “ادىرنا” ۇلتتىق پورتالى DW باسىلىمىنا سىلتەپ.
ماكروننىڭ ايتۋىنشا، 6 ناۋرىزدا وتەتىن ەۋرووداقتىڭ كەزەكتەن تىس سامميتىندە ۋكرايناعا قولداۋ كورسەتۋ جانە ەۋروپانىڭ قاۋىپسىزدىك جۇيەسىن قۇرۋ ماسەلەلەرى تالقىلانادى. ول ەۋروكوميسسياعا ۋكراينا ءۇشىن اۋقىمدى قارجىلاندىرۋ باعدارلاماسىن ىسكە قوسۋ تۋرالى تاپسىرما بەرىلۋى مۇمكىن ەكەنىن اتاپ ءوتتى.
فرانتسيا پرەزيدەنتى ەۋروپانىڭ قاۋىپسىزدىگى ءۇشىن اقش-تىڭ قولداۋىن ساقتاۋ ماڭىزدى ەكەنىن ايتتى. الايدا، ونىڭ پىكىرىنشە، اقش-تىڭ قازىرگى پرەزيدەنتى دونالد ترامپ رەسەيمەن كەلىسىمگە كەلۋگە بەيىم، بۇل – قاتەلىك.
ماكرون ۇلىبريتانيا پرەمەر-ءمينيسترى كير ستارمەرمەن بىرگە ۋكراينادا ەۋروپالىق بىتىمگەرلىك كۇشتەرىن ورنالاستىرۋ تۋرالى باستامانى ۇسىنعانىن دا مالىمدەدى. ول بۇل قادام كيەۆكە قاۋىپسىزدىك كەپىلدىگىن بەرۋ ءۇشىن ماڭىزدى ەكەنىن ايتتى.
سونىمەن قاتار، فرانتسيا باسشىسى رەسەيدى ەۋروپا ءۇشىن “ەكزيستەنتسيالدى قاۋىپ” دەپ اتاپ، ترامپتى ۋكراينامەن ديالوگتى جالعاستىرۋعا شاقىردى.
