13 ءساۋىر، جەكسەنبى كۇنى تاجىكستاننىڭ شىعىسىندا بولعان جەر سىلكىنىسىنىڭ سالدارىنان ءۇش جاسار بالا قازا تاۋىپ، 30-عا جۋىق ءۇي قيرادى، دەپ حابارلايدى "ادىرنا" ۇلتتىق پورتالى.
بۇل تۋرالى تاجىكستاننىڭ توتەنشە جاعدايلار جانە ازاماتتىق قورعانىس كوميتەتىنىڭ داعدارىس جاعدايلارىن باسقارۋ ورتالىعى مالىمدەدى.
"راشت اۋدانىندا بولعان جەراستى دۇمپۋلەرى سالدارىنان ءۇش جاسار بالانى ءۇيدىڭ قابىرعاسى باسىپ قالىپ، كوز جۇمدى", – دەلىنگەن حابارلامادا.
جەكسەنبى كۇنى تاجىكستاننىڭ شىعىسىندا ءۇش رەت جەر سىلكىندى. تاجىكستان سەيسمولوگتارىنىڭ مالىمەتىنشە، ءبىرىنشى سىلكىنىس جەرگىلىكتى ۋاقىتپەن 09:24-تە، ەكىنشىسى – 12:14-تە، ال ءۇشىنشىسى – 13:33-تە تىركەلگەن.
ەۋروپا-جەرورتا تەڭىزى سەيسمولوگيالىق ورتالىعىنىڭ (EMSC) اقپاراتىنا سايكەس، ءبىرىنشى جەر سىلكىنىسىنىڭ ماگنيتۋداسى – 5,9, ەكىنشىسى – 4,2, ءۇشىنشىسى – 4,7 بولعان.
بارلىق جەراستى دۇمپۋلەرى دۋشانبەدەن سولتۇستىك-شىعىسقا قاراي ورنالاسقان راشت اۋدانى اۋماعىندا تىركەلگەن. قاشىقتىعى ەل استاناسىنان شامامەن 158–163 شاقىرىم.
جەر سىلكىنىسى سالدارىنان بارلىعى 29 تۇرعىن ءۇي مەن ءبىر مەكتەپ قيراعان. قازىرگى تاڭدا زالالدى باعالاۋ ءۇشىن توتەنشە جاعدايلار كوميتەتىنىڭ ارنايى كوميسسياسى جۇمىس ىستەۋدە.
ايتا كەتەيىك، بۇل جەر سىلكىنىسى قازاقستاننىڭ وڭتۇستىگىندەگى استانا، تاراز، كەنتاۋ، تۇركىستان سەكىلدى 20-دان استام ەلدىمەكەندە، سونداي-اق وزبەكستان مەن قىرعىزستاندا دا سەزىلگەن.
