Франция президенті Эммануэль Макрон Еуроодақ Украинаға жүздеген миллиард еуро көлемінде қаржылай көмек көрсету мүмкіндігін қарастырып жатқанын мәлімдеді, деп хабарлайды “Адырна” ұлттық порталы DW басылымына сілтеп.
Макронның айтуынша, 6 наурызда өтетін Еуроодақтың кезектен тыс саммитінде Украинаға қолдау көрсету және Еуропаның қауіпсіздік жүйесін құру мәселелері талқыланады. Ол Еурокомиссияға Украина үшін ауқымды қаржыландыру бағдарламасын іске қосу туралы тапсырма берілуі мүмкін екенін атап өтті.
Франция президенті Еуропаның қауіпсіздігі үшін АҚШ-тың қолдауын сақтау маңызды екенін айтты. Алайда, оның пікірінше, АҚШ-тың қазіргі президенті Дональд Трамп Ресеймен келісімге келуге бейім, бұл – қателік.
Макрон Ұлыбритания премьер-министрі Кир Стармермен бірге Украинада еуропалық бітімгерлік күштерін орналастыру туралы бастаманы ұсынғанын да мәлімдеді. Ол бұл қадам Киевке қауіпсіздік кепілдігін беру үшін маңызды екенін айтты.
Сонымен қатар, Франция басшысы Ресейді Еуропа үшін “экзистенциалды қауіп” деп атап, Трампты Украинамен диалогты жалғастыруға шақырды.
