اقشا تابۋ ءۇشىن تايلاندقا كەتكەن ءتورت قازاقستاندىق ادام ساۋداسىمەن اينالىساتىن قىلمىستىق توپتاردىڭ قۇربانىنا اينالدى، دەپ حابارلايدى "ادىرنا" ۇلتتىق پورتالى "دۋنە" اا-عا سىلتەمە جاساپ.
ولار ميانمادا الاياقتىق بايلانىس ورتالىقتارىندا ءماجبۇرلى تۇردە جۇمىس ىستەگەن.
تەك قازاقستاندىقتار عانا ەمەس، بۇل جاعدايعا وزبەكستاننىڭ ەكى ازاماتى مەن قىرعىزستاننان كەلگەن سەگىز ادام دا تاپ بولعان. زارداپ شەككەندەردىڭ بارلىعى ديپلوماتتاردىڭ كومەگىمەن ەلدەرىنە ورالدى.
جابىرلەنۋشىلەردىڭ ايتۋىنشا، ولارعا تايلاندتان جوعارى اقى تولەنەتىن ونلاين جۇمىس ۇسىنىلعان. جول شىعىنى – تەگىن اۋە بيلەتتەرى دە قاراستىرىلعان.
الايدا، تايلاندقا بارعاننان كەيىن ولاردى زاڭسىز جولمەن ميانماعا الىپ كەتكەن. سول جەردە ولار قىلمىستىق توپتاردىڭ باقىلاۋىندا الاياقتىق ورتالىقتاردا جۇمىس ىستەۋگە ءماجبۇر بولعان. جابىرلەنۋشىلەر فيزيكالىق قىسىم مەن قوقان-لوققى كورگەن. ازات ەتۋ ءۇشىن ايتارلىقتاي اقشالاي وتەماقى قاجەت بولعان.
قىرعىزستاننىڭ تايلاندتا ديپلوماتيالىق وكىلدىگى بولماعاندىقتان، قىرعىزستان ازاماتتارىن ەلگە قايتارۋعا قازاقستان مەن وزبەكستان ديپلوماتتارى كومەك كورسەتكەن.
