اتىراۋ قالاسىنىڭ №2 سوتى زاڭسىز بەكىرە بالىعى مەن ۋىلدىرىق ساقتاعان تۇرعىنعا قاتىستى قىلمىستىق ءىستى قاراپ، وعان 3 جىل باس بوستاندىعىنان ايىرۋ جازاسىن تاعايىندادى، دەپ حابارلايدى "ادىرنا" ۇلتتىق پورتالى وبلىستىق سوتتىڭ ءباسپاسوز قىزمەتىنە سىلتەمە جاساپ.
تەرگەۋ مالىمەتىنشە، 2024 جىلعى 17 تامىزدا اتىراۋ قالاسى تۇرعىنىنىڭ ۇيىنە ءتىنتۋ جۇرگىزۋ بارىسىندا شامامەن 90 كەلى بەكىرە بالىعى مەن 146 گرامم بەكىرە ۋىلدىرىعى تابىلىپ، تاركىلەنگەن.
سوتتا ايىپتالۋشىنىڭ كىناسى ءتىنتۋ حاتتاماسى، سوت-بيولوگيالىق جانە سوت-تاۋار ساراپتامالارىنىڭ قورىتىندىلارى ارقىلى دالەلدەندى. ايىپتاۋشى تاراپ ايىپتالۋشىعا باس بوستاندىعىنان ايىرۋ جازاسىن تاعايىنداۋدى سۇراسا، سوتتالۋشى مەن ونىڭ قورعاۋشىلارى كەرىسىنشە – اقتاۋدى تالاپ ەتكەن.
سوت ۇكىمىنە سايكەس، قر قك 339-بابىمەن ("سيرەك كەزدەسەتىن جانە جويىلىپ كەتۋ قاۋپى بار جانۋارلارمەن زاڭسىز اينالىسۋ") كىنالى دەپ تانىلىپ، 3 جىل مەرزىمگە باس بوستاندىعىنان ايىرىلدى. سونىمەن قاتار، وعان 5 جىل بويى اتالعان سالادا قىزمەتپەن اينالىسۋعا تىيىم سالىندى.
الايدا سوت قر قك 74-بابىنىڭ 1-بولىگىنە سايكەس، سوتتالۋشىنىڭ 14 جاسقا تولماعان بالالارىنىڭ بولۋىنا بايلانىستى جازانى وتەۋ مەرزىمىن 3 جىلعا كەيىنگە قالدىردى.
ۇكىم ءالى زاڭدى كۇشىنە ەنگەن جوق.
