اۋعانستاننىڭ ناسيحات، ىزگىلىك جانە تەرىس قىلىقتىڭ الدىن الۋ مينيسترلىگى ءۇش ايلىق ۇزىلىستەن كەيىن “ارزۋ تۆ” تەلەارناسىنا قايتا حابار تاراتۋعا رۇقسات بەردى، دەپ حابارلايدى “ادىرنا” ۇلتتىق پورتالى Ariana News-كە سىلتەمە جاساپ.
كابۋلدا ورنالاسقان ستۋديا 2024 جىلدىڭ جەلتوقسانىندا جابىلعان. مينيسترلىكتىڭ مالىمەتىنشە، تەلەارنا يسلام قۇندىلىقتارىن ناسيحاتتاۋ ماقساتىندا جانە بۇقارالىق اقپارات قۇرالدارىنىڭ دۇرىس پايدالانىلۋىن قامتاماسىز ەتۋ ءۇشىن ۋاقىتشا جابىلعان.
تەلەارنانىڭ جابىلۋى كەزىندە جەتى قىزمەتكەر قاماۋعا الىنىپ، وندىرىستىك جابدىقتار تاركىلەنگەن. كەڭسە ەسىگىنە “ادەپسىز سەريالداردى كورسەتكەنى ءۇشىن” تەلەارنا جابىلعانى تۋرالى حابارلاما ىلىنگەن.
اۋعانستان جۋرناليستيكا ورتالىعىنىڭ (AFJC) دەرەگىنشە، تەلەارنا داري تىلىنە اۋدارىلعان تۇرىك سەريالدارىن كورسەتكەن.
مينيسترلىكتىڭ ءباسپاسوز حاتشىسى سايف ۋل-يسلام حايبەردىڭ ايتۋىنشا، “يسلام امىرلىگى باق-تى قولداۋعا جانە پىكىر ءبىلدىرۋ بوستاندىعىن يسلامدىق جانە ۇلتتىق قۇندىلىقتار نەگىزىندە قامتاماسىز ەتۋگە پەيىلدى”.
اۋعانستاننىڭ تاۋەلسىز جۋرناليستەر قاۋىمداستىعى تەلەارنانىڭ جۇمىسىن قايتا باستاۋ تۋرالى شەشىمدى قولداپ، بيلىككە ەركىن اقپارات قۇرالدارىن قولداعانى ءۇشىن العىس ءبىلدىردى.
