اقش پرەزيدەنتى دونالد ترامپ ەل تاريحىندا العاش رەت اعىلشىن ءتىلىن رەسمي مەملەكەتتىك ءتىل رەتىندە بەكىتەتىن جارلىققا قول قوياتىنىن مالىمدەدى، دەپ حابارلايدى “ادىرنا” ۇلتتىق پورتالى The Wall Street Journal گازەتىنە سىلتەپ.
قازىرگى ۋاقىتتا اقش-تا مەملەكەتتىك ءتىل فەدەرالدىق دەڭگەيدە زاڭ جۇزىندە بەكىتىلمەگەن. تەك كەيبىر شتاتتاردا عانا اعىلشىن ءتىلى رەسمي ءتىل بولىپ سانالادى. ProEnglish ۇيىمىنىڭ مالىمەتىنشە، بۇگىندە 32 شتات اعىلشىن ءتىلىن رەسمي دەپ مويىنداعان.
جاڭا جارلىق بۇرىنعى پرەزيدەنت بيلل كلينتون ەنگىزگەن فەدەرالدىق تالاپتى جويادى. ول تالاپقا سايكەس، فەدەرالدىق قارجى الاتىن اگەنتتىكتەر مەن ۇيىمدار اعىلشىن ءتىلىن بىلمەيتىن ازاماتتارعا تىلدىك كومەك كورسەتۋى ءتيىس بولعان.
اقش-تا اعىلشىن ءتىلىنىڭ مارتەبەسى، اسىرەسە، تەحاس شتاتىندا ءجيى تالقىلانىپ كەلەدى. وندا يسپان ءتىلىنىڭ كەڭىنەن قولدانىلۋى ۇزاق جىلدار بويى پىكىرتالاس تۋدىرعان. 2011 جىلى تەحاس سەناتورى يمميگرانتتار قۇقىعىن قورعاۋشى بەلسەندىنىڭ زاڭ شىعارۋشى ورگانداعى تىڭداۋدا اعىلشىن تىلىندە سويلەۋىن تالاپ ەتكەن.
دونالد ترامپتىڭ ساياسي ناۋقاندارى كەزىندە زاڭسىز يمميگراتسياعا قارسى تۇرۋ جانە اعىلشىن ءتىلىنىڭ ماڭىزدىلىعىن ارتتىرۋ نەگىزگى باعىتتاردىڭ ءبىرى بولعان. ول 2016 جىلعى سايلاۋالدى ۇگىت-ناسيحاتىندا قارسىلاسى دجەب بۋشتىڭ يسپان ءتىلىن قولدانعانىن سىنعا الىپ، «ءبىز – اعىلشىنشا سويلەيتىن ۇلتپىز» دەپ مالىمدەگەن ەدى.
