كرەمل باسشىسى ۆلاديمير پۋتين قاراشادا اقش پرەزيدەنتى دونالد ترامپ جانە قىتاي توراعاسى سي تسزينپينمەن كەزدەسىپ، ۋكرايناداعى جاعدايدى تالقىلاۋدى ۇسىندى. كەزدەسۋدىڭ ماقساتى — سوعىستى ماسكەۋگە ءتيىمدى شارتتارمەن اياقتاۋ جونىندە كەلىسىمگە كەلۋ. بۇل تۋرالى Wall Street Journal باسىلىمى جازدى، دەپ حابارلايدى «ادىرنا» ءتىلشىسى.
باسىلىمنىڭ مالىمەتىنشە، رەسەي كەلىسسوزدەردى 18-19 قاراشا كۇندەرى قىتايدىڭ شەنچجەن قالاسىندا وتەتىن ازيا-تىنىق مۇحيتى ەكونوميكالىق ىنتىماقتاستىعى ءسامميتى اياسىندا وتكىزۋدى ۇسىنعان.
رەسەي پرەزيدەنتىنىڭ ءباسپاسوز حاتشىسى دميتري پەسكوۆ مۇنداي كەزدەسۋدىڭ وتكىزىلۋ مۇمكىندىگى تالقىلانىپ جاتقانىن راستاعان.
«كەزدەسۋدىڭ ءوزى نەمەسە ونىڭ ىقتيمال كۇن ءتارتىبى تۋرالى ازىرگە ناقتى تۇسىنىك جوق. دەگەنمەن ءۇش تاراپ تا مۇنداي كەزدەسۋدىڭ ءوتۋ مۇمكىندىگىن جوققا شىعارمايدى»، — دەدى ول باسىلىمعا بەرگەن جاۋابىندا.
اقش اكىمشىلىگىندەگى جوعارى لاۋازىمدى وكىلدىڭ ايتۋىنشا، اق ءۇي باسشىسى ازىرگە مۇنداي سامميت وتكىزۋگە كەلىسىم بەرمەگەن. الايدا ول بۇل ۇسىنىسقا وڭ كوزقاراس تانىتۋى مۇمكىن.
WSJ باسىلىمى رەسەي بارلاۋ قىزمەتىنىڭ بۇرىنعى قىزمەتكەرىنە سىلتەمە جاساپ، كرەمل بۇل ۇسىنىستى 9 قازاندا ترامپپەن تەلەفون ارقىلى سويلەسۋ كەزىندە جەتكىزگەنىن جازدى. سونداي-اق اڭگىمە بارىسىندا رەسەيدەن اقش-قا ديزەل وتىنىن جەتكىزۋ تۋرالى كەلىسىمگە قول جەتكىزىلگەنى ايتىلعان.
16 قازاندا ترامپ جارلىق ارقىلى ماسكەۋگە قارسى ماڭىزدى سانكتسيالاردىڭ كۇشىن جويعان ەدى.
اق ءۇي، سونداي-اق رەسەي مەن قىتايدىڭ ۆاشينگتونداعى ەلشىلىكتەرى ازىرگە بۇقارالىق اقپارات قۇرالدارىنىڭ تۇسىنىكتەمە بەرۋ تۋرالى ساۋالدارىنا جاۋاپ بەرگەن جوق.
