اقش اسكەرى قاجەت بولعان جاعدايدا يرانعا قارسى شابۋىلداردى ءتورت-بەس اپتا بويى جالعاستىرا الادى. بۇل تۋرالى اق ءۇي باسشىسى دونالد ترامپ The New York Times باسىلىمىنا بەرگەن سۇحباتىندا ايتتى، دەپ حابارلايدى «ادىرنا» ءتىلشىسى.
ء«يا، ءبىز ءتورت-بەس اپتاعا جوسپارلاپ وتىرمىز. بۇل قيىندىق تۋدىرمايدى»، – دەدى ول.
Daily Mail باسىلىمىنا بەرگەن سۇحباتىندا امەريكالىق كوشباسشى يرانعا قارسى وپەراتسيا ء«تورت اپتا نەمەسە ودان دا از ۋاقىتقا سوزىلاتىنىن» ايتتى.
باسىلىمنىڭ مالىمەتىنشە، اق ءۇي باسشىسى كەلىسسوزدەرگە ءالى دە اشىق ەكەنىن جەتكىزگەن، الايدا «سويلەسۋدى وتكەن اپتادا باستاۋ كەرەك ەدى» دەپ اتاپ وتكەن. دەسە دە، ول تەگەران اقش تالاپتارىن قاناعاتتاندىرعان جاعدايدا سوققىلاردى توقتاتۋعا دايىن ەكەنىن ءبىلدىردى.
ترامپ سونداي-اق ۆيدەوۇندەۋ جاريالاپ، يراندىقتار امەريكالىق شابۋىلدان كەيىن قارۋىن تاستاماسا، كۇشتىك قۇرىلىمدار مەن اسكەري قىزمەتكەرلەردى ءولىم كۇتىپ تۇرعانىن ەسكەرتتى.
«مەن يسلام رەۆوليۋتسياسى ساقشىلار كورپۋسىن، يران ارمياسىن، پوليتسياسىن قارۋدى تاستاۋعا جانە تولىق يممۋنيتەت الۋعا شاقىرامىن. ايتپەسە، ءولىم بولادى. ءولىم – شىندىققا اينالادى، بۇل جاقسى بولمايدى»، – دەدى ول.
اقش پرەزيدەنتى يران حالقىنا دا ۇندەۋ جاساپ، ەل ازاماتتارىنا بەرگەن ۋادەسىن ورىنداعانىن ايتىپ، ءساتتى پايدالانۋعا شاقىردى.
«قالعانى وزدەرىڭىزگە بايلانىستى. ءبىز سىزدەرمەن بىرگە بولىپ، كومەكتەسەمىز»، – دەدى ترامپ.
28 اقپاندا اقش پەن يزرايل يرانعا قارسى اۋقىمدى اسكەري وپەراتسيا باستاعان ەدى. Tel Aviv تاراپى سوققىلاردىڭ ماقساتى تەگەراننىڭ يادرولىق قارۋعا قول جەتكىزۋىنە جول بەرمەۋ ەكەنىن مالىمدەدى. ال ترامپ يران فلوتىن جانە قورعانىس ونەركاسىبىن جويۋ كەرەكتەگىن ايتىپ، ەل ازاماتتارىن رەجيمدى قۇلاتۋعا شاقىردى. باق مالىمەتىنشە، زىمىراندار تەك اسكەري نىساندارعا عانا ەمەس، يسلام رەسپۋبليكاسىنداعى جانە ءوڭىردىڭ وزگە ەلدەرىندەگى ازاماتتىق ينفراقۇرىلىمعا دا ءتيىپ جاتىر. تەگەران جاۋاپ رەتىندە يزرايل اۋماعىنا جانە تاياۋ شىعىستاعى امەريكالىق بازالارعا سوققى جاساۋدا.
