الماتى وبلىسىندا 16 جاستاعى شەرزات پولاتتىڭ ولىمىنە بايلانىستى تەرگەۋ اياقتالىپ، ءىس سوتقا جولداۋ ءۇشىن پروكۋراتۋراعا جىبەرىلدى، دەپ حابارلايدى "ادىرنا" ۇلتتىق پورتالى.
الماتى وبلىسىنىڭ پوليتسيا دەپارتامەنتى مالىمەتىنشە، تەرگەۋ بارىسىندا 40 سوت-مەديتسينالىق ساراپتاما جۇرگىزىلىپ، 200-گە جۋىق كۋاگەردەن جاۋاپ الىنعان. سونداي-اق، 8 بەينەماتەريال زەرتتەلىپ، كۇدىكتىلەردىڭ بارلىعىنا قۇقىقتىق باعا بەرىلدى.
"قىلمىستىق ءىستىڭ كولەمى – 62 توم. ءاربىر تەرگەۋ ارەكەتى زاڭ تالاپتارىنا سايكەس جۇرگىزىلدى. تەرگەۋ پروتسەسىندە اشىقتىق پەن وبەكتيۆتىلىك قامتاماسىز ەتىلدى. سونىمەن قاتار، تەرگەۋ بارىسى مەن كونستيتۋتسيالىق قۇقىقتاردىڭ ساقتالۋىن پروكۋراتۋرا باقىلاۋىنا الدى", – دەپ مالىمدەدى قۇقىق قورعاۋ ورگاندارى.
2023 جىلدىڭ 4 قازانىنا قاراعان ءتۇنى تالعار قالاسىندا ءجاسوسپىرىم شەرزات پولات قازا تاپقان. بۇل وقيعا قوعامدا ۇلكەن رەزونانس تۋدىرىپ، جابىرلەنۋشىنىڭ تۋىستارى مەن تۇرعىندار ءادىل تەرگەۋ جۇرگىزۋدى تالاپ ەتىپ، نارازىلىق ۇيىمداستىردى.
كوپ ۇزاماي، 12 قازانعا قاراعان ءتۇنى كۇدىكتىلەردىڭ ءبىرى سانالاتىن نۇرىموۆتار وتباسىنىڭ ءۇيى تولىعىمەن ورتەنىپ كەتتى. باس پروكۋراتۋرا بۇل ءورتتىڭ قاساقانا ۇيىمداستىرىلعانىن مالىمدەدى. جەرگىلىكتى بيلىك زارداپ شەككەن وتباسىعا ۋاقىتشا باسپانا مەن تاۋلىك بويى كۇزەت بەرىپ، ءۇيدى قالپىنا كەلتىرۋگە ۋادە ەتتى.
سونداي-اق، 9 جەلتوقساندا شەرزات پولاتتىڭ ولىمىنە بايلانىستى تەرگەۋ بارىسىندا ونىڭ اعاسىنىڭ ءمايىتى تابىلدى. پوليتسيا ونىڭ ءوز-وزىنە قول جۇمساعانىن حابارلادى.
قازىرگى ۋاقىتتا ءىس سوتقا جىبەرىلۋگە دايىن، ال قوعام وكىلدەرى ءادىل شەشىم شىعارىلۋىن كۇتىپ وتىر.
