الماتى وبلىسىنىڭ اكىمى مارات سۇلتانعازيەۆ ورتالىق كوممۋنيكاتسيالار قىزمەتىندەگى بريفينگتە ءبىلىم، دەنساۋلىق ساقتاۋ جانە مادەنيەت سالالارىندا اتقارىلعان جۇمىستار تۋرالى مالىمەت بەردى.
اكىمنىڭ ايتۋىنشا، 2022 جىلدان بەرى 45 جاڭا مەكتەپ جانە 6 جاپسارجاي سالىندى، سونداي-اق 55 مەكتەپ كۇردەلى جوندەۋدەن ءوتتى. ونىڭ 11-ءى ينۆەستورلار ەسەبىنەن، ال 20-ى «كەلەشەك مەكتەپتەرى» جوباسى اياسىندا سالىنعان.
جىل سوڭىنا دەيىن تاعى التى مەكتەپ اشۋ جوسپارلانىپ وتىر.
ءبىلىم نىساندارىنىڭ كوبەيۋى ءۇش اۋىسىمدا وقىتاتىن مەكتەپتەر سانىن ايتارلىقتاي قىسقارتقان. مەكتەپ ينفراقۇرىلىمىن كەڭەيتۋ ناتيجەسىندە كەيىنگى ءۇش جىلدا ءۇش اۋىسىمدا ءبىلىم بەرەتىن مەكتەپتەردىڭ سانى 52-دەن 28-گە دەيىن قىسقاردى.
«وسى ورايدا قالعان 28 مەكتەپتى ءبىر مەزگىلدە باستاپ سالۋ ءۇشىن وتاندىق جانە شەتەلدىك ينۆەستورلادى EPC مەحانيزمى بويىنشا كەلىسسوزدەرگە شاقىرامىن»، - دەدى سۇلتانعازيەۆ.
ءوڭىر اكىمى دەنساۋلىق ساقتاۋ جانە مادەنيەت ينفراقۇرىلىمىنىڭ دا دامىپ جاتقانىن اتاپ ءوتتى.
وبلىستا 356 مەديتسينالىق نىسان بار، ولاردىڭ 54%-ى توزعان. 2022-2025 جىلدار ارالىعىندا 55 نىسانعا قۇرىلىس جۇمىسى جۇرگىزىلدى. 6 ملرد تەڭگەگە 153 بىرلىك مەديتسينالىق جابدىق ساتىپ الىندى. ماسەلەن، 300 شاقىرىم قاشىقتىقتا ورنالاسقان نارىنقول اۋىلىنىڭ تۇرعىندارى الماتىعا نەمەسە وبلىس ورتالىعىنا كەلمەستەن تولىق مەديتسينالىق قىزمەت الا الادى.
سونىمەن قاتار 7 مادەنيەت ءۇيى، 6 سپورت كەشەنى، مەملەكەتتىك ارحيۆ جانە ونەر مەكتەبى سالىندى.
