اقش-تىڭ نيۋ-دجەرسي قالاسىندا تۇراتىن تانىمال جازۋشى دجۋديت لينبەرگ قازاق اقىنى ەربول الشىنبايدىڭ “جىلقى عانا جالعانداعى سەرىگىم” اتتى ولەڭدەر توپتاماسىنا ءتانتى بولعانىن جەتكىزدى، دەپ حابارلايدى “ادىرنا” ۇلتتىق پورتالى Abai.kz-كە سىلتەپ.
كوشپەندىلەر مادەنيەتىنە ەرەكشە قىزىعۋشىلىق تانىتاتىن امەريكالىق قالامگەرگە بۇل جىرلار جولما-جول اعىلشىن تىلىنە اۋدارىلىپ جىبەرىلگەن. جازۋشى ءوز اسەرىن بىلايشا سيپاتتايدى:
ء“ار بولىمىنەن مەن دالا تىنىسىن، ونىڭ قۋاتىن سەزىنە الدىم. دالادا وسكەن شۋ اساۋ پىراقتار مەن ونى جىرلاعان اقىننىڭ قارىم-قاتىناسى تەك جەكە بايلانىس قانا ەمەس، سونىمەن قاتار كوشپەندى ءومىر سالتى مەن ۇمىت بولعان داستۇرلەردىڭ مەتافوراسى رەتىندە كورىندى. ولەڭدەگى “داۋىل مەن ۋاقىت ءمۇجىپ تاستاعان ەجەلگى مولالار، ۇمىت بولعان زيراتتار توپىراققا اينالىپ بارادى” دەگەن جولدار قازاقتىڭ عاسىرلار بويعى مادەني مۇراسىنىڭ وتكەن شاقتا تەرەڭ كومىلىپ قالعانىن كورسەتەدى”، – دەيدى دجۋديت لينبەرگ.
ول سونداي-اق، اقىننىڭ بالالىق شاعى مەن جىلقىلارعا دەگەن ەرەكشە قۇرمەتى تۋرالى تولعانعان ساتتەرىنە نازار اۋدارعان. جاس كەزىندە قارا تايىمەن بايلانىسقان بالا كەيىن زامان تالابىنا ساي قالاعا كەتۋگە ءماجبۇر بولىپ، داستۇرلەرىن ارتتا قالدىرادى. بىراق بۇل ساعىنىش ماڭگىلىك جادىمىزدا ساقتالاتىنىن جازۋشى ەرەكشە اتاپ ءوتتى.
“جىلقىنىڭ قۋ باسى تۋرالى جىر” اتتى ءبولىم وتكەن داستۇرلەردىڭ جوعالۋىن كورسەتەدى. بىراق سوڭعى بولىمدە جىلقىلاردىڭ قايتا ورالۋى تۋرالى جىرلانعانى ماعان ءۇمىت پەن رۋحاني جاڭعىرۋدى بىلدىرەتىندەي كورىندى. ءتاڭىردىڭ كەڭ اسپانى استىندا كوشپەندى مادەنيەت ءوزىنىڭ قۇندىلىعىن جوعالتپايدى”، – دەپ تۇيىندەدى امەريكالىق جازۋشى.
دجۋديت لينبەرگ قازاق جىرلارىن تۇپنۇسقا تىلىندە وقىسا، ودان دا تەرەڭ اسەر الاتىنىنا سەنىمدى ەكەنىن ايتتى. وسىلايشا، قازاق پوەزياسى مەن كوشپەندىلەر مادەنيەتى الىس امەريكادا دا ەرەكشە باعالانۋدا.
