AQSh-tyń Nıý-Djersı qalasynda turatyn tanymal jazýshy Djýdıt Lınberg qazaq aqyny Erbol Alshynbaıdyń “Jylqy ǵana jalǵandaǵy serigim” atty óleńder toptamasyna tánti bolǵanyn jetkizdi, dep habarlaıdy “Adyrna” ulttyq portaly Abai.kz-ke siltep.
Kóshpendiler mádenıetine erekshe qyzyǵýshylyq tanytatyn amerıkalyq qalamgerge bul jyrlar jolma-jol aǵylshyn tiline aýdarylyp jiberilgen. Jazýshy óz áserin bylaısha sıpattaıdy:
“Ár bóliminen men dala tynysyn, onyń qýatyn sezine aldym. Dalada ósken shý asaý pyraqtar men ony jyrlaǵan aqynnyń qarym-qatynasy tek jeke baılanys qana emes, sonymen qatar kóshpendi ómir salty men umyt bolǵan dástúrlerdiń metaforasy retinde kórindi. Óleńdegi “daýyl men ýaqyt mújip tastaǵan ejelgi molalar, umyt bolǵan zırattar topyraqqa aınalyp barady” degen joldar qazaqtyń ǵasyrlar boıǵy mádenı murasynyń ótken shaqta tereń kómilip qalǵanyn kórsetedi”, – deıdi Djýdıt Lınberg.
Ol sondaı-aq, aqynnyń balalyq shaǵy men jylqylarǵa degen erekshe qurmeti týraly tolǵanǵan sátterine nazar aýdarǵan. Jas kezinde qara taıymen baılanysqan bala keıin zaman talabyna saı qalaǵa ketýge májbúr bolyp, dástúrlerin artta qaldyrady. Biraq bul saǵynysh máńgilik jadymyzda saqtalatynyn jazýshy erekshe atap ótti.
“Jylqynyń qý basy týraly jyr” atty bólim ótken dástúrlerdiń joǵalýyn kórsetedi. Biraq sońǵy bólimde jylqylardyń qaıta oralýy týraly jyrlanǵany maǵan úmit pen rýhanı jańǵyrýdy bildiretindeı kórindi. Táńirdiń keń aspany astynda kóshpendi mádenıet óziniń qundylyǵyn joǵaltpaıdy”, – dep túıindedi amerıkalyq jazýshy.
Djýdıt Lınberg qazaq jyrlaryn túpnusqa tilinde oqysa, odan da tereń áser alatynyna senimdi ekenin aıtty. Osylaısha, qazaq poezııasy men kóshpendiler mádenıeti alys Amerıkada da erekshe baǵalanýda.
