اقتوبە وبلىسىندا باستاۋىش سىنىپتىڭ 23 وقۋشى ۋلانعان، دەپ حابارلايدى "ادىرنا" ۇلتتىق پورتالى.
جاعا ۇستاتارلىق جاعداي 18 اقپان كۇنى اقتوبە وبلىسى قوبدا اۋدانىنىڭ ورتالىعىندا ورنالاسقان قوبىلاندى باتىر اتىنداعى مەكتەپتە بولعان. وندا 4-سىنىپتىڭ 23 وقۋشىسى بىرىنەن سوڭ ءبىرى قۇسىپ، باسى اينالىپ، وزدەرىن ناشار سەزىنگەن. ارتىنشا وقۋشىلار تۇگەلدەي اۋرۋحاناعا جەتكىزىلدى.
بەلگىلى بولعانداي، سول سىنىپتىڭ وقۋشىلارى قىتايشا جازۋى بار ءتاتتىنى اكەلىپ ءبولىپ جەگەن.
«سول جەردە جەتى وقۋشىنىڭ باسى اينالىپ، لوقسىر، بورتپە پايدا بولعان. سىنىپتىڭ باسقا بالالارى يىستەن وزدەرىن جايسىز سەزىنگەن. بارلىق بالا بىردەن اۋرۋحاناعا جەتكىزىلدى. قازىر جاعدايلارى جاقسى» ،– دەدى ىشكى ساياسات ءبولىمىنىڭ باسشىسى ارمان قابىلوۆ.
قازىر قوبدا اۋداندىق اۋرۋحاناسىندا 9 وقۋشى ەمدەلىپ جاتىر. ولار تاعى ءبىر كۇن دارىگەردىڭ باقىلاۋىندا بولادى.
«كەشە 23 بالانى اۋداندىق اۋرۋحاناعا اكەلدى. قىتايدان شىققان بەلگىسىز ءتاتتىنى جەتى بالا جەگەن، قالعان بالالارعا ءيىسى رەاكتسيا بەرگەن. بۇگىن تاڭەرتەڭ وبلىس ورتالىعىنان پەدياتر بارىپ تەكسەردى. توعىز بالا بۇگىنشە باقىلاۋدا بولادى. قالعان وقۋشىلار ۇيلەرىنە جىبەرىلدى»، - دەپ مالىمدەدى اقتوبە وبلىستىق دەنساۋلىق ساقتاۋ باسقارماسى.
اۋدان اكىمدىگىنىڭ حابارلاۋىنشا، بارلىق ماتەريالدار پوليتسياعا جولدانعان.
