اقتوبەدە ءبىلىم كۇنىنىڭ بىت-شىتى شىقتى. ءبىر مەزەتتە التى بىردەي مەكتەپتە ءبىلىم كۇنىنە ارنالعان جيىن توقتاتىلدى. پوليتسەيلەر مەن ءورت سوندىرۋشىلەر عيماراتتى قورشاۋعا الىپ، مەكتەپكە جينالعانداردىڭ بارلىعىن قاۋىپسىز جەرگە كوشىردى. ەلدى دۇرلىكتىگەن نە جاعداي؟
بۇل تۋرالى «ەۋرازيا» ءبىرىنشى ارناسى حابارلايدى.
اقبايان سۇلتانمۇراتوۆا، ءتىلشى:
ء"بىز قازىر اقتوبەدەگى №2 مەكتەپ-گيمنازيانىڭ جانىندا تۇرمىز. ءبىلىم كۇنىنە ارنالعان ساتاناتتى جيىن بۇل مەكتەپتە ساعات 8-گە جوسپارلانعان. 8-دەن 8-30-عا دەيىنگى شارا قالىتى جاعدايدا وتكەن. اتا-انالاردىڭ ايتۋىنشا، ساعات 9-داعى شاراعا جينالعان ساتتە، اۋماقتى پوليتسەيلەر قورشاپ، بارلىعىن قاۋىپسىز جەرگە كوشىرىپتى. ايتۋلارىنشا، مەكتەپكە جارىلعىش زات قويىلعان دەگەن".
پوليتسەيلەر عيمارات جانىنا ەشكىمدى جولاتپايدى. ءورت ءسوندىرۋ قىزمەتى بار، جەدەل جاردەم كولىگى بارلىعى مەكتەپتىڭ جانىندا تۇر. ءيىسشىل يتتەرىن جەتەكتەگەن كينولوگتار دا كەلىپ جەتتى. وقۋشىلار مەن اتا-انالار، ۇستازدار مەكتەپ ماڭىن اينالسوقتاپ كەتەتىن ەمەس. بارىنەن بۇرىن بالاسىن ءبىرىنشى سىنىپقا الىپ كەلگەن اتا-انالاردىڭ كوڭىل كۇيى ءتۇسىپ كەتكەن.
«جارىلعىش زات» تۋرالى جايسىز حابار قالانىڭ 12-ءشى شاعىن اۋدانىنداعى مەكتەپتەرگە دە جەتكەن. قۇتقارۋ قىزمەتتەرى ءبىر اۋلادا ورنالاسقان ەكى بىردەي مەكتەپكە دەرەۋ جەتكەن. ماڭىنا جان جۋىتپايدى. ساپەرلەر جۇمىس ىستەپ جاتىر.
ءجامىش بالعىمباەۆا، قالا تۇرعىنى:
«تاڭەرتەڭ تىنىش بولدى عوي. ءبىر نەمەرەم بارىپ كەلدى. مىناداي ەستىدىك عوي. كەيىن قاراي قايتامىز. اپايىن كورەمىز با دەپ ەدىك. قولىنداعى گۇلى مەن قاعازىن بەرىپ. بىلتىر 1 كلاسقا دا بارا المادى عوي لينەيكاعا. ءبىرىنشى رەت كەلە جاتىر ەدى، بولماي قالدى».
ءبىلىم كۇنىنىڭ بەرەكەسىن قاشىرعاننىڭ كىم ەكەنىن پوليتسەيلەر انىقتايتىن بولادى. ال وبلىستىق ءبىلىم باسقارماسى حابارلاما العان بويى، 6 مەكتەپتەگى شارانى دەرەۋ توقتاتقان. قالعان 418 مەكتەپتە ساباق جالعاساتىنىن مالىمدەدى.
گرافيكا:
"ساعات 08.30 شاماسىندا №2 ورتا مەكتەپتىڭ ەلەكتروندى پوچتاسىنا اقتوبە قالاسىنىڭ 6 مەكتەبىندە (№1, 2, 22, 21, 51, 56 ورتا مەكتەپتەر) بومبا قويىلعانى تۋرالى حابارلاما كەلىپ ءتۇستى. بارلىق شۇعىل قىزمەتتەر مەن ساپەرلەر توبى دەرەۋ وقيعا ورنىنا شىقتى، وقۋشىلاردى، مەكتەپ ۇجىمىن ەۆاكۋاتسيالاۋ ۇيىمداستىرىلدى.
اتالعان دەرەك بويىنشا قازاقستان رەسپۋبليكاسى قىلمىستىق كودەكستىڭ «تەرروريزم اكتىسى تۋرالى كورىنەۋ جالعان حابارلاۋ» بابى بويىنشا سوتقا دەيىنگى تەرگەۋ باستالدى".
اقتوبە وبلىستىق پوليتسيا دەپارتامەنتىنىڭ الەۋمەتتىك جەلىدەگى رەسمي پاراقشاسىنان
بۇل باپتىڭ سانكتسياسى 5 جىلعا دەيىن باس بوستاندىعىنان ايىرۋدى كوزدەيدى. "جالپى، جارىلعىش زات قويىلدى" دەپ، جالعان قوڭىراۋ شالىپ، نە ەلەكتروندى پوچتاعا حات جازىپ جىبەرۋ سوڭعى كەزدە «قالىپتى» جاعدايعا اينالىپ بارادى. جىلدىڭ باسىندا ەكى رەت مەكتەپ-گيمنازياعا بومبا قويلدى دەگەن شاقىرتۋ ءتۇسىپ، كەيىن جالعان ەكەنى انىقتالعان ەدى. ال پوليتسەيلەر مەكتەپتىڭ ەلەكتروندى پوشتاسىنا ۇرەي تۋعىزاتىن حاتتى كىم جولداعانىن سول كۇيى تاپپادى.
