وڭتۇستىك كورەيا قىتايدىڭ DeepSeek جاساندى ينتەللەكت چات-بوتىن جۇكتەۋدى شەكتەدى. بۇل تۋرالى ەلدىڭ جەكە دەرەكتەردى قورعاۋ جونىندەگى مەملەكەتتىك ورگاندارى مالىمدەدى، دەپ حابارلايدى “ادىرنا” ۇلتتىق پورتالى.
قىتايلىق جي قاۋىپسىزدىككە قاتەر بولىپ سانالدى.
DeepSeek اتاۋى الەمدىك جاڭالىقتاردا پايدا بولعان العاشقى اپتادا وڭتۇستىك كورەيادا چات-بوتتىڭ تانىمالدىعى وتە تەز ارتتى. ول قوسىمشا دۇكەندەرىندە جىلدام جوعارى ورىندارعا كوتەرىلىپ، ءبىر اپتا ىشىندە ميلليوننان استام رەت جۇكتەلگەن. بىراق بۇل تانىمالدىلىقتىڭ ءوسۋى كوپتەگەن ەلدەردە ونىڭ قاۋىپسىزدىك پەن ۇلتتىق قاۋىپسىزدىككە قاتىستى الاڭداۋشىلىقتارىن تۋدىرىپ، شەكتەۋلەر ەنگىزۋگە سەبەپ بولدى.
وڭتۇستىك كورەيانىڭ جەكە دەرەكتەردى قورعاۋ كوميسسياسى سەنبى كۇنى كەشكە DeepSeek قوسىمشاسىنىڭ App Store مەن Google Play دۇكەندەرىندە قولجەتىمسىز ەكەنىن حابارلادى. بۇدان بۇرىن بىرقاتار مەملەكەتتىك مەكەمەلەر قىزمەتكەرلەرىنە چات-بوتتى جۇمىس قۇرىلعىلارىنا جۇكتەۋگە تىيىم سالعان بولاتىن. ەلدىڭ پرەزيدەنت مىندەتىن اتقارۋشى چحۆە سان موك DeepSeek-ءتى «شوك» دەپ اتادى، بۇل تەك جاساندى ينتەللەكت سالاسىنا عانا ەمەس، باسقا دا سالالارعا اسەر ەتۋى مۇمكىن.
قوسىمشا قازىر جۇكتەلمەسە دە، ونى بۇرىن ورناتقان ادامدار قولدانۋدى جالعاستىرۋدا، ال كوپتەگەن قولدانۋشىلار چات-بوتتى تەك ونىڭ ۆەب-سايتى ارقىلى پايدالانادى.
قىتايلىق DeepSeek ءوز قوسىمشاسىن وتكەن ايدا شىعارعاننان كەيىن، ول الەمدىك تەحنولوگيالىق يندۋستريانى ءدۇر سىلكىندىرىپ، اقش-تىڭ جاساندى ينتەللەكت سالاسىنداعى كوشباسشىلىعىنا دەگەن سەنىمدىلىكتى شايقالتىپ تاستادى. ول الەمدەگى ەڭ تانىمال جاساندى ينتەللەكت چات-بوتتارىنىڭ بىرىنە اينالدى، بىراق بىرنەشە ەلدە وعان شەكتەۋلەر ەنگىزىلدى. سەبەبى DeepSeek باسقا وسىنداي قوسىمشالار سياقتى جەكە دەرەكتەردى جيناي الادى. مىسالى، ەلەكتروندى پوشتا مەكەنجايى مەن تۋعان كۇنىن، سونىمەن قاتار پايدالانۋشىلاردان الىنعان سۇراۋلاردى «ەستە ساقتاپ»، ولاردى ءونىمدى جاقسارتۋ ءۇشىن پايدالانۋى مۇمكىن.
وڭتۇستىك كورەيادان باسقا، تايۆان مەن اۆستراليا دا بۇل قوسىمشانى مەملەكەتتىك قۇرىلعىلاردا پايدالانۋعا تىيىم سالدى. اۆستراليا ۇكىمەتى بۇل تىيىمدى DeepSeek-ءتىڭ قىتايلىق بولۋىنا عانا ەمەس، ونىڭ ۇلتتىق قاۋىپسىزدىككە توندىرەتىن قاتەرى بار ەكەندىگىنە بايلانىستى ەنگىزگەنىن ايتادى.
يتاليانىڭ رەتتەۋشى ورگانى 2023 جىلدىڭ كوكتەمىندە قاۋىپسىزدىك سەبەپتەرىمەن ChatGPT قوسىمشاسىن تىيىم سالعاننان كەيىن (قىسقا ۋاقىتتان سوڭ تىيىم الىنىپ تاستالعان), قازىر ءدال سول سەبەپتەرمەن DeepSeek-كە تىيىم سالدى جانە كومپانيادان ءوز دەرەكتەردى قورعاۋ ساياساتىن جاقسارتۋدى تالاپ ەتۋدە. فرانتسيا مەن يرلانديانىڭ دەرەكتەردى قورعاۋ ورگاندارى دا DeepSeek-كە قاتىستى سۇراقتار قويىپ، ونىڭ جەكە دەرەكتەردى قالاي وڭدەيتىنىنە، اتاپ ايتقاندا دەرەكتەردىڭ قىتايدا ورنالاسقان سەرۆەرلەردە ساقتالاتىنىنا بايلانىستى الاڭداۋشىلىق ءبىلدىردى.
اقش-تىڭ زاڭ شىعارۋشىلارى دا فەدەرالدى دەڭگەيدە DeepSeek-ءتى مەملەكەتتىك قىزمەتكەرلەرگە جۇمىس قۇرىلعىلارىندا پايدالانۋعا تىيىم سالاتىن زاڭ جوباسىن ۇسىندى. ال تەحاس، ۆيردجينيا جانە نيۋ-يورك شتاتتارىندا بۇل تىيىم ەنگىزىلگەن.
