Ońtústik Koreıa Qytaıdyń DeepSeek jasandy ıntellekt chat-botyn júkteýdi shektedi. Bul týraly eldiń jeke derekterdi qorǵaý jónindegi memlekettik organdary málimdedi, dep habarlaıdy “Adyrna” ulttyq portaly.
Qytaılyq JI qaýipsizdikke qater bolyp sanaldy.
DeepSeek ataýy álemdik jańalyqtarda paıda bolǵan alǵashqy aptada Ońtústik Koreıada chat-bottyń tanymaldyǵy óte tez artty. Ol qosymsha dúkenderinde jyldam joǵary oryndarǵa kóterilip, bir apta ishinde mıllıonnan astam ret júktelgen. Biraq bul tanymaldylyqtyń ósýi kóptegen elderde onyń qaýipsizdik pen ulttyq qaýipsizdikke qatysty alańdaýshylyqtaryn týdyryp, shekteýler engizýge sebep boldy.
Ońtústik Koreıanyń jeke derekterdi qorǵaý komıssııasy senbi kúni keshke DeepSeek qosymshasynyń App Store men Google Play dúkenderinde qoljetimsiz ekenin habarlady. Budan buryn birqatar memlekettik mekemeler qyzmetkerlerine chat-botty jumys qurylǵylaryna júkteýge tyıym salǵan bolatyn. Eldiń prezıdent mindetin atqarýshy Chhve San Mok DeepSeek-ti «shok» dep atady, bul tek jasandy ıntellekt salasyna ǵana emes, basqa da salalarǵa áser etýi múmkin.
Qosymsha qazir júktelmese de, ony buryn ornatqan adamdar qoldanýdy jalǵastyrýda, al kóptegen qoldanýshylar chat-botty tek onyń veb-saıty arqyly paıdalanady.
Qytaılyq DeepSeek óz qosymshasyn ótken aıda shyǵarǵannan keıin, ol álemdik tehnologııalyq ındýstrııany dúr silkindirip, AQSh-tyń jasandy ıntellekt salasyndaǵy kóshbasshylyǵyna degen senimdilikti shaıqaltyp tastady. Ol álemdegi eń tanymal jasandy ıntellekt chat-bottarynyń birine aınaldy, biraq birneshe elde oǵan shekteýler engizildi. Sebebi DeepSeek basqa osyndaı qosymshalar sııaqty jeke derekterdi jınaı alady. Mysaly, elektrondy poshta mekenjaıy men týǵan kúnin, sonymen qatar paıdalanýshylardan alynǵan suraýlardy «este saqtap», olardy ónimdi jaqsartý úshin paıdalanýy múmkin.
Ońtústik Koreıadan basqa, Taıvan men Avstralııa da bul qosymshany memlekettik qurylǵylarda paıdalanýǵa tyıym saldy. Avstralııa úkimeti bul tyıymdy DeepSeek-tiń Qytaılyq bolýyna ǵana emes, onyń ulttyq qaýipsizdikke tóndiretin qateri bar ekendigine baılanysty engizgenin aıtady.
Italııanyń retteýshi organy 2023 jyldyń kókteminde qaýipsizdik sebepterimen ChatGPT qosymshasyn tyıym salǵannan keıin (qysqa ýaqyttan soń tyıym alynyp tastalǵan), qazir dál sol sebeptermen DeepSeek-ke tyıym saldy jáne kompanııadan óz derekterdi qorǵaý saıasatyn jaqsartýdy talap etýde. Franııa men Irlandııanyń derekterdi qorǵaý organdary da DeepSeek-ke qatysty suraqtar qoıyp, onyń jeke derekterdi qalaı óńdeıtinine, atap aıtqanda derekterdiń Qytaıda ornalasqan serverlerde saqtalatynyna baılanysty alańdaýshylyq bildirdi.
AQSh-tyń zań shyǵarýshylary da federaldy deńgeıde DeepSeek-ti memlekettik qyzmetkerlerge jumys qurylǵylarynda paıdalanýǵa tyıym salatyn zań jobasyn usyndy. Al Tehas, Vırdjınııa jáne Nıý-Iork shtattarynda bul tyıym engizilgen.
