پرەمەر-ءمينيستردىڭ ورىنباسارى قانات بوزىمباەۆ ورتالىق ازيا ەلدەرىنىڭ مەملەكەتارالىق ۇيلەستىرۋ سۋ شارۋاشىلىعى كوميسسياسىنىڭ 90-شى وتىرىسىن وتكىزدى.
ءىس-شاراعا قازاقستان، قىرعىزستان، تاجىكستان، تۇرىكمەنستان، وزبەكستاننىڭ سالالىق جانە سىرتقى ساياساتقا جاۋاپتى ۆەدومستۆولارىنىڭ وكىلدەرى، سونداي-اق حالىقارالىق قارجى ينستيتۋتتارى مەن دامۋ ۇيىمدارىنىڭ وكىلدەرى قاتىستى.
اتالعان ۇيىم – وڭىردەگى ترانسشەكارالىق سۋ رەسۋرستارىن ستراتەگيالىق باسقارۋداعى نەگىزگى مەملەكەتارالىق ورگان. بۇگىنگى وتىرىستىڭ كۇن ءتارتىبى اگروكليماتتىق جاعدايدىڭ كۇردەلىلىگىنە بايلانىستى ايقىندالدى جانە سۋ رەسۋرستارىن ءادىل ءبولۋ جونىندەگى جەدەل ماسەلەلەرگە ارنالدى.
قانات بوزىمباەۆ بيىلعى ۆەگەتاتسيالىق كەزەڭنىڭ اسا كۇردەلى جاعدايدا ءوتىپ جاتقانىن اتاپ ءوتتى. الداعى جىلدارى كۇتىلەتىن كليماتتىق وزگەرىس پەن سۋ تاپشىلىعى ورتالىق ازيا ەلدەرىنەن ۇيلەستىرىلگەن ارەكەتتەر مەن قول جەتكىزىلگەن ۋاعدالاستىقتاردى قاتاڭ ساقتاۋدى تالاپ ەتەدى.
«شاردارا سۋ قويماسىنداعى سۋ كولەمى كوپجىلدىق ورتاشا دەڭگەيدەن تومەندەدى. بۇل – جاي عانا كورسەتكىش ەمەس، اعىستىڭ تومەنگى بولىگىندەگى سۋمەن قامتاماسىز ەتىلۋىنە تونگەن ناقتى قاۋىپ. وكىنىشكە قاراي، وسى كوميسسيا اياسىندا قابىلدانعان شەشىمدەر تولىق كولەمدە ورىندالماي وتىر، بۇل ءوز كەزەگىندە سۋ رەجيمدەرىن رەتتەۋدە ەلەۋلى قيىندىقتار تۋعىزۋدا. ۋاقىت بىزدەن اناعۇرلىم جىلدام ارەكەت ەتۋدى تالاپ ەتەدى. ءبىز تەك تالقىلاپ، جوسپارلاپ قانا قويماي، ناقتى شارالار قابىلداۋىمىز قاجەت. سەرىكتەستىگىمىز سەنىم مەن ءوزارا تۇسىنىستىك رۋحىندا دامي بەرەدى دەپ سەنەمىن، ال بىرلەسكەن جۇمىس ەلدەرىمىز بەن بۇكىل ءوڭىر ءۇشىن ناقتى ناتيجەلەر اكەلەدى», — دەدى قانات بوزىمباەۆ.
وتىرىس اياسىندا قانات بوزىمباەۆ تاجىكستان مەن وزبەكستاننىڭ سۋ شارۋاشىلىعى ۆەدومستۆولارى باسشىلارىمەن ەكىجاقتى كەزدەسۋلەر وتكىزدى. كەزدەسۋلەردە سىرداريا جانە ءامۋداريا وزەندەرى باسسەيندەرى بويىنشا بەكىتىلگەن سۋ ليميتتەرى مەن سۋ قويمالارىنىڭ جۇمىس رەجيمدەرىن پايدالانۋ ماسەلەلەرى تالقىلانىپ، كەلەسى جىلعى ۆەگەتاتسيالىق كەزەڭگە دايىندىق ءىس-شارالارىنىڭ جوسپارى ايقىندالدى.
جيىن قورىتىندىسى بويىنشا مەملەكەتارالىق ۇيلەستىرۋ سۋ شارۋاشىلىعى كوميسسياسىنىڭ 90-شى وتىرىسىنىڭ حاتتاماسىنا قول قويۋ ءراسىمى ءوتتى. كەلەسى وتىرىس تۇرىكمەنستاندا وتەدى.
