Oljas Bektenov sý tasqyny qaýpine baılanysty respýblıkalyq keńes ótkizdi, dep habarlaıdy “Adyrna” ulttyq portaly.
Premer-mınıstr Oljas Bektenov Soltústik Qazaqstan oblysyna jumys sapary barysynda sý tasqyny kezeńine daıyndyq máseleleri boıynsha respýblıkalyq keńes ótkizdi. Keńeske ekologııa jáne tabıǵı resýrstar mınıstri Erlan Nysanbaev, sý resýrstary jáne ırrıgaııa mınıstri Nurjan Nurjigitov, tótenshe jaǵdaılar mınıstri Shyńǵys Árinov, sondaı-aq birqatar oblys ákimderi qatysty. Jıynda bıylǵy kóktemde sý tasqyny qaýpiniń joǵary ekeni aıtylyp, oǵan daıyndyq sharalary talqylandy.
“Qazgıdromet” RMK-nyń aldyn ala boljamyna sáıkes, aqpan aıynda aýa raıynyń jyly bolýyna baılanysty muz qatý qaýpi bar. Al naýryzda jaýyn-shashyn mólsheriniń artýy jáne temperatýranyń joǵarylaýy sý tasqyny qaýpin kúsheıtedi.
Ekologııa jáne sý resýrstary mınıstrliginiń derekteri boıynsha, ylǵal mólsheri Soltústik Qazaqstan, Aqmola, Pavlodar, Qaraǵandy, Shyǵys Qazaqstan, Ulytaý, Abaı, Jetisý, Aqtóbe, Atyraý jáne Mańǵystaý oblystarynyń batys bólikterinde, sondaı-aq Almaty, Túrkistan, Jambyl oblystarynyń taý bókterinde normadan joǵary.
"Qazir sý tasqyny kezeńine saqadaı-saımyz dep aıtýǵa áli erte. Osy kúnge deıin tıisti sheshimder qabyldanbaǵan birqatar másele bar. Bul ásirese sý basý qaýpi joǵary aımaqtarǵa qatysty. Qazir, eń aldymen, eldi mekenderdiń sý tasqynyna naqty daıyndyq deńgeıin tekserý kerek. Árbir eldi mekenge baryp, qalyptasqan jaǵdaıdy jan-jaqty saralap, tıisti sharalar qabyldaıtyn óńirlik komıssııalar qurýdy tapsyramyn. Barlyq ákim tikeleı jaýap beredi. Sondyqtan jumysty jandandyryp, sý tasqynyna qarsy belgilengen sharalardy naqty iske asyrý qajet", - dedi Oljas Bektenov.
Tótenshe jaǵdaılar mınıstri Shyńǵys Árinovtiń aıtýynsha, búginde sý tasqyny qaýpi bar aımaqta 1 223 eldi meken ornalasqan.
Premer-mınıstr jaǵdaıdyń kúrdeliligin atap ótip, barlyq jaýapty organdarǵa tasqynnyń aldyn alý úshin tıisti sharalardy kúsheıtýdi tapsyrdy.
