ورال قالاسىنىڭ اكىمدىگى كوكتەمدە سۋ تاسقىنى بولۋى مۇمكىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
اكىمنىڭ ورىنباسارى جاندوس دۇيسەنعاليەۆتىڭ ءمالىم ەتكەنىندەي، وسى كەزگە دەيىن 43 ساياجاي بىرلەستىگىندە قىسقى مەزگىلدە تۇرىپ جاتقان 350 وتباسىعا كوكتەمدە سۋ باسۋى مۇمكىن ەكەندىگى جونىندە حابارلاما بەرىلگەنىن حابارلادى. بۇگىندە 40-تان استام ساياجاي بىرلەستىگى تەكسەرىلىپ، بۇلاردا 900 وتباسىنىڭ تۇرىپ جاتقانى انىقتالدى.
«بارلىق ساياجاي بىرلەستىكتەرى بويىنشا تولىق ەلەكتروندى-اقپاراتتىق بازا جاساقتالاتىن بولادى. بۇل ساياجايلارداعى ادامداردىڭ، تۇرعىنجايلاردىڭ، ءۇي جانۋارلارىنىڭ جانە نىسانداردىڭ ناقتى سانىن انىقتاۋعا مۇمكىندىك بەرەدى. ساياجايدا تۇرىپ جاتقان وتباسىلاردىڭ بارلىعىنا ەسكەرتۋ حابارلامالارى بەرىلەتىن بولادى»، دەيدى ج.دۇيسەنعاليەۆ.
ونىڭ سوزىنشە، بيىلعى سۋ تاسقىنىنان كوپتەگەن ساياجايلاردىڭ زارداپ شەككەن. وسى ۋاقىتقا دەيىن كەلتىرىلگەن زالالدى وتەۋ جونىندە تۇرعىنداردان 11 مىڭعا جۋىق ءوتىنىش تۇسكەن.
«كۇنى بۇگىنگە دەيىن قالالىق كوميسسيا جالعىز ءۇيى اپاتتى دەپ تانىلعان 2 589 ازاماتتىڭ ءوتىنىشىن قاناعاتتاندىرىپ، بۇل وتباسىلارعا ءبىرىنشى جانە ەكىنشى نارىقتان باسپانا بەرىلدى. سونىمەن قاتار 487 وتباسىعا ءۇيىن جوندەۋ ءۇشىن 1,7 ملرد تەڭگە قاراجات ءبولىندى. 10 942 وتباسىعا 4 ملرد تەڭگە كولەمىندە ءبىر جولعى الەۋمەتتىك كومەك (100 اەك) كورسەتىلدى. 9 032 وتباسىعا 4,1 ملرد تەڭگەنىڭ مۇلىكتىك شىعىندارى (150 اەك-كە دەيىن) وتەلدى. بۇل جۇمىستار ءالى دە جالعاسۋدا»، دەيدى قالا اكىمىنىڭ ورىنباسارى.
