فوتو: facebook.com/BagdatMussin
قازاقتەلەكوم كاسپي تەڭىزى ارقىلى وتەتىن جاڭا تالشىقتى-وپتيكالىق بايلانىس جەلىسىنە ارنالعان كابەلدىڭ دايىن ەكەنىن حابارلادى. جوبا اياسىندا اقتاۋ مەن سۋمگايت قالالارىن جالعايتىن سۋاستى ينتەرنەت جەلىسى 2026 جىلى ىسكە قوسىلۋى مۇمكىن.
كومپانيا مالىمەتىنشە، سۋاستى كابەلى 2026 جىلدىڭ ءساۋىر-ماۋسىم ايلارىندا كاسپي جاعالاۋىنا جەتكىزىلەدى. ال تەڭىز تۇبىنە توسەۋ جۇمىستارى جاز مەزگىلىندە باستالادى.
كاسپي تالشىقتى-وپتيكالىق بايلانىس جەلىسى AzerTelecom كومپانياسىمەن بىرلەسىپ جۇزەگە اسىرىلىپ جاتىر. جوبانىڭ تەڭىزدىك جانە قۇرلىقتىق زەرتتەۋ جۇمىستارى تولىق اياقتالعان، ال كابەل ءوندىرىلىپ، جونەلتىلگەن.
جوبانىڭ نەگىزگى ماقساتى — قازاقستان مەن ازەربايجان اراسىنداعى تسيفرلىق بايلانىستى كۇشەيتىپ، ينتەرنەت وتكىزۋ قابىلەتىن ارتتىرۋ.
سونىمەن قاتار كومپانيا اۋىل-ايماقتاردى ينتەرنەتپەن قامتۋ باعىتىنداعى جۇمىستار تۋرالى دا مالىمەت بەردى. “تازارتۋ”، “Sapa+” جانە “اۋىل Online” جوبالارى ارقىلى 630 مىڭ وتباسى جوعارى جىلدامدىقتى ينتەرنەتكە قوسىلعان. 2027 جىلعا دەيىن 1 ميلليوننان استام اۋىل تۇرعىنى، 1941 مەكتەپ جانە 2905 مەملەكەتتىك مەكەمە ينتەرنەتكە قوسىلماق.
كاسپي تۇبىمەن كابەل توسەۋ جوباسى العاش رەت 2019 جىلى باستالعان. باستاپقى جوسپار بويىنشا ول 2021 جىلى اياقتالۋى ءتيىس ەدى، الايدا ءتۇرلى سەبەپتەرمەن مەرزىمى بىرنەشە رەت وزگەرتىلگەن. قازىر جوبا قايتا جاندانىپ، كەزەڭ-كەزەڭىمەن ىسكە اسىرىلىپ جاتىر.
