سەناتور ەلىمىزدە ايىپپۇل تولەۋ بارىسىندا ارنايى جەڭىلدىكتىڭ الىنىپ تاستالۋى مۇمكىن ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
سەناتور مارات قوجاەۆ ءوزىنىڭ دەپۋتاتتىق ساۋالىندا ايىپپۇل ارقىلى ەرەجەنى قايتا بۇزۋمەن كۇرەس مۇمكىن ەمەستىگىن ايتتى.
«تەحنيكالىق قۇرالدار جول ءجۇرىسى قاعيدالارىن بۇزۋدىڭ نەگىزگى بولىگىن اۆتوماتتى تۇردە تىركەيدى، قازىرگى كەزدە ول ەرەجەنى بۇزۋدىڭ سانى 3 708 084 بولىپ وتىر. ەرەجەنى جۇيەلى تۇردە بۇزۋدىڭ الدىن الۋعا قولدانىستاعى قۇقىق قولدانۋ تاجىريبەسى مۇمكىندىك بەرمەيدى. ويتكەنى تەحنيكالىق قۇرالدار اۆتوماتتى تۇردە تىركەگەن جۇرگىزۋشىنى ەرەجەنى قايتا بۇزعانى ءۇشىن جاۋاپقا تارتۋ مۇمكىن ەمەس. سەبەبى، كولىك قۇرالىنىڭ يەسىنە ەرەجە بۇزۋدىڭ تاريحى ەسكەرىلمەي ايىپپۇل جازىلادى. سونداي-اق، جول قوزعالىسى ەرەجەسىن جۇيەلى تۇردە ەلەمەيتىن، جول ءتارتىبىن قاساقانا بۇزۋشىلارعا جول ءجۇرىسى قاعيدالارى بويىنشا ەمتيحاندى قايتا تاپسىرۋدى مىندەتتەۋ مۇمكىن ەمەس. سونىمەن قاتار، تەحنيكالىق قۇرالدار ەرەجەنى بۇزۋ دەرەگىن عانا تىركەيدى، بىراق جۇرگىزۋشىنىڭ دايىندىق دەڭگەيىن جانە ونىڭ جول ەرەجەسىن ورەسكەل بۇزۋ مەن قاۋىپتى ارەكەتكە بەيىمدىلىگىن باعالاۋعا مۇمكىندىك بەرمەيدى»، - دەپ اتاپ ءوتتى سەناتور.
سەناتور ءوز سوزىندە كەيبىر جوعارى تولەم تولەۋگە قابىلەتتى جۇرگىزۋشىلەر ايىپپۇلدى جاۋاپكەرشىلىكتەن قاشۋدىڭ ادەتكە اينالعان تەتىگى رەتىندە تۇسىنۋىنە الاڭداۋشىلىق ءبىلدىردى.
«اسىرەسە، تەحنيكالىق قۇرالدار تىركەگەن ەرەجە بۇزۋ دەرەگى بويىنشا جۇرگىزۋشىلەردىڭ جاۋاپكەرشىلىگىن كۇشەيتۋ ماسەلەسىن قاراۋدى ۇسىنامىز. اقبتك-دەگى وزگەرىستەردە تەحنيكالىق قۇرالدار تىركەگەن 10 جانە ودان دا كوپ بۇزۋشىلىعى بار جۇرگىزۋشىلەردى جول ءجۇرىسى قاعيدالارى بويىنشا تەوريالىق ەمتيحاندى قايتا تاپسىرۋعا جىبەرۋدى مىندەتتى ەتۋ ماڭىزدى. جۇرگىزۋشى كۋالىگىنەن ۋاقىتشا ايىرۋعا دەيىن كامەرالارمەن تىركەلگەن جول قوزعالىسى ەرەجەسىن قايتالاپ بۇزعانى ءۇشىن جاۋاپكەرشىلىكتى كۇشەيتۋ قاجەت. زاڭ تالابىن بۇزۋشىلارعا بەلگىلى ءبىر كەزەڭدەگى ءتارتىپ بۇزۋ سانىن ەسكەرەتىن سارالانعان جازا تەتىگىن ازىرلەۋ جانە ەرەجەنى جۇيەلى تۇردە بۇزۋشىلارعا ايىپپۇل تولەۋدە 50% جەڭىلدىكتى الىپ تاستاۋ ماڭىزدى»، - دەدى دەپۋتات.
