سولتۇستىك قازاقستان وبلىسىندا جانتۇرشىگەرلىك جول اپاتى بولىپ، 5 ادام قازا تاپتى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
«16 ماۋسىمدا ساعات 07: 55-تە سقو تايىنشا اۋدانى ايماق اۋىلىنىڭ ماڭىنداعى كوكشەتاۋ-ومبى اۆتوجولىنىڭ 53 شاقىرىمىندا Lexus جانە "ۆاز-2104" اۆتوماشينالارىنىڭ سوقتىعىسۋى بولدى. الدىن الا بولجام بويىنشا، Lexus اۆتوماشيناسى كوكشەتاۋ قالاسىنان كەلە جاتىپ قارسى جول جولاعىنا شىعىپ كەتكەن»،—دەلىنگەن حابارلامادا.اپات سالدارىنان 7 ادام زارداپ شەكتى: 5 ادام وقيعا ورنىندا قايتىس بولدى، ونىڭ ىشىندە 2 اۆتوكولىكتىڭ جۇرگىزۋشىلەرى. قالعان زارداپ شەككەندەر مەديتسينالىق كومەك كورسەتۋ ءۇشىن كوكشەتاۋ قالاسىنداعى اۋرۋحاناعا جەتكىزىلدى. جۇرگىزۋشىلەردەن مەديتسينالىق كۋالاندىرۋ جۇرگىزۋ ءۇشىن قان الىندى. جول اپاتى دەرەگى قىلمىستىق كودەكستىڭ 345-بابىنىڭ 4-بولىگى بويىنشا "كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋى ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان ءىس-ارەكەت "بويىنشا سوتالدى تەرگەپ-تەكسەرۋلەردىڭ بىرىڭعاي تىزىلىمىندە تىركەلگەن. قاجەتتى ساراپتامالار تاعايىندالدى.
ۇقساس جاڭالىقتار
