قاراعاندى وبلىسىندا اۆتوبۋستىڭ قاتىسۋىمەن بولعان جول-كولىك وقيعاسى سالدارىنان ءۇش ادام قازا تاۋىپ، تورتەۋى زارداپ شەكتى، دەپ حابارلايدى “ادىرنا” ۇلتتىق پورتالى وبلىستىق پوليتسيا دەپارتامەنتىنىڭ ءباسپاسوز قىزمەتىنە سىلتەپ.
«جول اپاتى سالدارىنان Chery Tiggo كولىگىنىڭ جۇرگىزۋشىسى مەن ونىڭ ەكى جولاۋشىسى العان جاراقاتتارىنان وقيعا ورنىندا قازا تاپتى، ونىڭ تاعى ءۇش جولاۋشىسى مەن اۆتوبۋس جۇرگىزۋشىسى مەديتسينالىق مەكەمەگە جەتكىزىلدى. وقيعا كەزىندە اۆتوبۋستا 51 ادام بولعان»، - دەلىنگەن حابارلامادا.
17 شىلدەدە ساعات 6.00 شاماسىندا الماتى-ەكاتەرينبۋرگ تاس جولىندا اقسۋ-ايۋلى كەنتىنەن 5 شاقىرىم جەردە كراسنويارسك-شىمكەنت باعىتىندا Chery Tiggo جەڭىل كولىگى مەن Van Hool اۆتوبۋسى سوقتىعىسقان جول اپاتى ورىن العان.
اتالعان فاكتى بويىنشا قىلمىستىق ءىس قوزعالدى. قاجەتتى ساراپتامالار تاعايىندالىپ، تەرگەۋ امالدارى جۇرگىزىلۋدە.
