تۇركىستان وبلىسىندا ۆولەيبولدان جارىسقا بارا جاتقان مەكتەپ وقۋشىلارى مىنگەن كولىك جول اپاتىنا ۇشىراپ، ءۇش ءجاسوسپىرىم كوز جۇمدى، دەپ حابارلايدى "ادىرنا" ۇلتتىق پورتالى ينفورمبيۋروعا سىلتەپ.
قايعىلى وقيعا شاردارا–بايىرقۇم تاس جولىندا بولعان.
الدىن الا مالىمەت بويىنشا، 8-سىنىپ وقۋشىلارىنان قۇرالعان كوماندا وبلىستىق تۋرنيرگە ارىس قالاسىنا بەت العان. ولاردى ەكى كولىكپەن الىپ شىققان. الايدا جول ۇستىندە وقۋشىلار وتىرعان جەڭىل كولىكتى قارسى باعىتتان كەلگەن جۇك كولىگى قاتتى جىلدامدىقپەن سوققان.
سوققى سالدارىنان «Chevrolet Cobalt» ماركالى اۆتوكولىك اۋدارىلىپ، قاتتى زاقىمدانعان. وقيعا ورنىندا 14 جاستاعى ءجاسوسپىرىم قازا تاپسا، تاعى ەكى وقۋشى العان جاراقاتتارىنان كوز جۇمدى.
مارقۇمداردىڭ مۇعالىمى ايدانا تۇرسىنوۆانىڭ ايتۋىنشا، وقۋشىلار جارىسقا ۇلكەن ۇمىتپەن اتتانعان.
"وقۋشىلارىم سپورتقا وتە قىزىعاتىن. جارىستارعا قاتىسىپ، جۇلدەلى ورىندار الىپ ءجۇردى. جولعا شىعار الدىندا «جەڭىسپەن ورالامىز» دەپ قۋانىپ كەتكەن ەدى", – دەيدى ول.
كولىك تىزگىنىندە بولعان 34 جاستاعى جاتتىقتىرۋشى اۋىر جاراقات الىپ، اۋرۋحاناعا جەتكىزىلگەن. ال ەكىنشى كولىكتە وتىرعان سەگىز وقۋشى امان قالعان.
تۇركىستان وبلىستىق پوليتسيا دەپارتامەنتىنىڭ مالىمەتىنشە، جۇك كولىگىنىڭ جۇرگىزۋشىسى قاماۋعا الىنىپ، قىلمىستىق ءىس قوزعالدى. سونىمەن قاتار كامەلەتكە تولماعانداردى تاسىمالداۋ كەزىندە ءتيىستى ورگاندارعا الدىن الا حابار بەرىلمەگەنى انىقتالعان.
قازا تاپقان وقۋشىلار ۆولەيبولدان ءتۇرلى جارىستارعا قاتىسىپ، ءوڭىر نامىسىن قورعاپ جۇرگەن دارىندى سپورتشىلار بولعان.
ءۇش وقۋشىنى تۋىستارى 24 ءساۋىر كۇنى جەر قوينىنا تاپسىردى.
