Senator elımızde aiyppūl töleu barysynda arnaiy jeŋıldıktıŋ alynyp tastaluy mümkın ekenın mälımdedı, dep habarlaidy "Adyrna" ūlttyq portaly.
Senator Marat Qojaev özınıŋ deputattyq saualynda aiyppūl arqyly erejenı qaita būzumen küres mümkın emestıgın aitty.
«Tehnikalyq qūraldar Jol jürısı qaǧidalaryn būzudyŋ negızgı bölıgın avtomatty türde tırkeidı, qazırgı kezde ol erejenı būzudyŋ sany 3 708 084 bolyp otyr. Erejenı jüielı türde būzudyŋ aldyn aluǧa qoldanystaǧy qūqyq qoldanu täjıribesı mümkındık bermeidı. Öitkenı tehnikalyq qūraldar avtomatty türde tırkegen jürgızuşını erejenı qaita būzǧany üşın jauapqa tartu mümkın emes. Sebebı, kölık qūralynyŋ iesıne ereje būzudyŋ tarihy eskerılmei aiyppūl jazylady. Sondai-aq, jol qozǧalysy erejesın jüielı türde elemeitın, jol tärtıbın qasaqana būzuşylarǧa Jol jürısı qaǧidalary boiynşa emtihandy qaita tapsyrudy mındetteu mümkın emes. Sonymen qatar, tehnikalyq qūraldar erejenı būzu deregın ǧana tırkeidı, bıraq jürgızuşınıŋ daiyndyq deŋgeiın jäne onyŋ jol erejesın öreskel būzu men qauıptı äreketke beiımdılıgın baǧalauǧa mümkındık bermeidı», - dep atap öttı senator.Senator öz sözınde keibır joǧary tölem töleuge qabılettı jürgızuşıler aiyppūldy jauapkerşılıkten qaşudyŋ ädetke ainalǧan tetıgı retınde tüsınuıne alaŋdauşylyq bıldırdı.
«Äsırese, tehnikalyq qūraldar tırkegen ereje būzu deregı boiynşa jürgızuşılerdıŋ jauapkerşılıgın küşeitu mäselesın qaraudy ūsynamyz. ÄQBtK-degı özgerısterde tehnikalyq qūraldar tırkegen 10 jäne odan da köp būzuşylyǧy bar jürgızuşılerdı Jol jürısı qaǧidalary boiynşa teoriialyq emtihandy qaita tapsyruǧa jıberudı mındettı etu maŋyzdy. Jürgızuşı kuälıgınen uaqytşa aiyruǧa deiın kameralarmen tırkelgen jol qozǧalysy erejesın qaitalap būzǧany üşın jauapkerşılıktı küşeitu qajet. Zaŋ talabyn būzuşylarǧa belgılı bır kezeŋdegı tärtıp būzu sanyn eskeretın saralanǧan jaza tetıgın äzırleu jäne erejenı jüielı türde būzuşylarǧa aiyppūl töleude 50% jeŋıldıktı alyp tastau maŋyzdy», - dedı deputat.
Ūqsas jaŋalyqtar
