جاپونيانىڭ گۋمما پرەفەكتۋراسىندا سەنبىگە قاراعان ءتۇنى 56 اۆتوكولىك قاتىسقان ءىرى جول-كولىك وقيعاسى ورىن الدى، دەپ حابارلايدى "ادىرنا" ۇلتتىق پورتالى ريا نوۆوستي اگەنتتىگىنە سىلتەمە جاساپ.
ميناكامي قالاسى ماڭىنداعى كانەتسۋ تاسجولىمەن كەلە جاتقان ءىرى جۇك كولىگى تايىپ كەتىپ، جولدا توقتاپ قالعان. وعان جەڭىل كولىكتەر سوقتىعىسىپ، سالدارىنان ءورت شىققان.
كۋاگەرلەردىڭ ايتۋىنشا، اپات جولدىڭ ەڭىس بولىگىندە جانە بۇرىلىستان كەيىن بولعان. وسى سەبەپتى جۇك كولىگىنىڭ ارتىندا كەلە جاتقان جۇرگىزۋشىلەر جولداعى جاعدايدى الدىن الا بايقاماي، بىرىنەن سوڭ ءبىرى سوقتىعىسقان.
قازىرگى ۋاقىتتا اپات بولعان جول بولىگىندە قوزعالىس ەكى باعىتتا دا تولىقتاي توقتاتىلعان.
جاپوندىق بۇقارالىق اقپارات قۇرالدارىنىڭ دەرەگىنشە، جول اپاتى سالدارىنان ءبىر ادام قازا تاۋىپ، كەمىندە 26 ادام جاراقات العان. ونىڭ ىشىندە بەس ادام اۋىر حالدە اۋرۋحاناعا جەتكىزىلگەن، ال 21 ادام جەڭىل جاراقات العان.
وقيعا كۋاگەرلەرىنىڭ ءبىرى:
«جەڭىل كولىكتەن الدىمەن ءتۇتىن شىعىپ، كەيىن ءورت تۇتانا باستادى. بارلىعى بۇرىلىستا بولدى، ادامدار نە بولىپ جاتقانىن تۇسىنبەي، جول تومەن قاراي كەتكەندىكتەن سوقتىعىسا بەردى»، – دەپ مالىمدەدى.
