الماتىدا پوليتسيا جەكەمەنشىك ءۇيدىڭ قورشاۋىن قاساقانا ورتەگەن كۇدىكتىنى ىزدەستىرىپ جاتىر، دەپ حابارلايدى “ادىرنا” ۇلتتىق پورتالى ماسساگەتكە سىلتەپ.
وقيعا 11 اقپاندا تۇرعىت وزال كوشەسىندە بولعان.
بەينەباقىلاۋ كامەرالارىنا ءتۇسىپ قالعان كادرلارعا سايكەس، بەلگىسىز ەر ادام قولىنداعى جانعىش سۇيىقتىق تولى كانيسترمەن كەلىپ، ءۇيدىڭ قورشاۋىنا وت قويعان.
ءۇي يەسىنىڭ ايتۋىنشا، وقيعا كەزىندە ءۇي ىشىندە كىشكەنتاي بالالار بولعان. دەگەنمەن، دەر كەزىندە ارەكەت ەتىلىپ، ورتتەن ەشكىم زارداپ شەككەن جوق.
"ول تولە بي كوشەسىنەن ۇيىمە قاراي ادەيى كەلگەن، قولىندا جانعىش سۇيىقتىق تولى كانيستر بولعان. سول كەزدە ىشتە كىشكەنتاي بالالار بولدى", – دەدى الماتىلىق ايەل.
الماتى پوليتسيا دەپارتامەنتىنىڭ مالىمدەۋىنشە، بۇل فاكت بويىنشا "قاساقانا ءورت قويۋ" بابى بويىنشا قىلمىستىق ءىس قوزعالدى. قازىر كۇدىكتىنىڭ جەكە باسىن انىقتاۋ جانە قىلمىستىڭ سەبەبىن ءبىلۋ ءۇشىن جەدەل ىزدەستىرۋ شارالارى جۇرگىزىلىپ جاتىر.
"قاساقانا ءورت قويۋ دەرەگى بويىنشا قىلمىستىق ءىس قوزعالدى. قازىر كۇدىكتىنى جانە قىلمىستىڭ سەبەبىن انىقتاۋ ءۇشىن جەدەل ىزدەستىرۋ ءىس-شارالارى جۇرگىزىلىپ جاتىر", – دەدى الماتى پوليتسيا دەپارتامەنتىنىڭ ءباسپاسوز قىزمەتى وكىلى.
