الماتىدا تەرروريزم اكتىسى تۋرالى كورىنەۋ جالعان حابارلاما جىبەرگەن ءجاسوسپىرىم ۇستالدى، دەپ حابارلايدى "ادىرنا" ۇلتتىق پورتالى.
وقيعا 14 جاسار بوزبالانىڭ WhatsApp جەلىسى ارقىلى بەلگىسىز تۇرعىننىڭ نومىرىنە مەدەۋ اۋدانىنداعى تۇرعىن ءۇيدى جارماق نيەتى بار ەكەندىگىن جازعانىنان كەيىن تىركەلگەن.
«اقپارات شۇعىل دەن قويۋدى تالاپ ەتتى. مەكەنجايعا جەدەل قىزمەتتەردىڭ بارلىق وكىلى جىبەرىلىپ، ساپەرلەر عيماراتتى تەكسەردى. جارىلعىش زاتتار تابىلعان جوق، حابارلامانىڭ جالعان ەكەنى راستالدى»، – دەدى پوليتسيا وكىلدەرى.
جەدەل-ىزدەستىرۋ شارالارىنىڭ ناتيجەسىندە جالعان اقپاراتتىڭ اۆتورى ءبىر ساعات ىشىندە انىقتالعان. ول – ءدال سول ءۇيدىڭ 14 جاستاعى تۇرعىنى بولىپ شىقتى. ءجاسوسپىرىم ءوز كىناسىن مويىنداپ، بۇل ارەكەتتى بۇزاقىلىق نيەتپەن جاساعانىن ايتقان.
اتالعان فاكتى بويىنشا قىلمىستىق كودەكستىڭ 273-بابى (تەرروريزم اكتىسى تۋرالى كورىنەۋ جالعان حابارلاۋ) بويىنشا سوتقا دەيىنگى تەرگەۋ امالدارى باستالدى. قىلمىستىق ءىستى الماتى قالالىق پوليتسيا دەپارتامەنتىنىڭ تەرگەۋ باسقارماسى جۇرگىزىپ جاتىر.
پوليتسيا وكىلدەرى ازاماتتارعا مۇنداي ارەكەتتەردىڭ سالدارى اۋىر ەكەنىن ەسكەرتىپ، تەرروريزمگە قاتىستى جالعان حابارلاما تاراتقاندارعا التى جىلعا دەيىن باس بوستاندىعىنان ايىرۋ جازاسى قاراستىرىلعانىن ەسكە سالدى.
