بيىل 11 اقپان كۇنى ساياسي جانە قوعام قايراتكەرى التىنبەك سارسەنباەۆتىڭ قازا تاپقانىنا 19 جىل تولدى. وسى قارالى داتادا قايراتكەردىڭ «ۋاقىتىندا ايتىلعان شىندىق» جانە «الاشتىڭ التىنبەگى» اتتى ەكى تومدىق كىتابىنىڭ تۇساۋكەسەرى ءوتتى، دەپ حابارلايدى "ادىرنا" ۇلتتىق پورتالى.
التىنبەك سارسەنباەۆ – تاۋەلسىز قازاقستان تاريحىنداعى ەڭ جاس مينيسترلەردىڭ ءبىرى. ونىڭ كوزقاراستارى مەن باتىل مالىمدەمەلەرى قوعامدا ۇلكەن رەزونانس تۋدىردى. جازۋشى مارات ءبايدىلداۇلىنىڭ ايتۋىنشا، سارسەنباەۆ سول كەزدەگى پرەزيدەنت نۇرسۇلتان نازارباەۆقا اشىق سىن ايتىپ، راحات اليەۆ پەن داريعا نازارباەۆانىڭ مەملەكەتتى تولىقتاي باسىپ الۋ قاۋپىن العاشقىلاردىڭ ءبىرى بولىپ كوتەرگەن. بۇل ءۇشىن ول قىسىمعا ۇشىراپ، اقىرى ساياسي قاستاندىقتىڭ قۇربانىنا اينالدى.
مارقۇمنىڭ اعاسى، جۋرناليست رىسبەك سارسەنبايۇلى ساياساتكەردىڭ حالىق مۇددەسى ءۇشىن كۇرەسكەنىن جانە ونىڭ قازاسى تاۋەلسىز ەل تاريحىنداعى ەڭ ۇلكەن قاسىرەتتى وقيعالاردىڭ ءبىرى بولعانىن اتاپ ءوتتى.
«التىنبەككە اتىلعان وق – حالىققا اتىلعان وق» دەگەن زيالى قاۋىم پىكىرىن كەلتىرگەن ول، ەگەر قايراتكەر ءتىرى بولعاندا، ەلدە كوپتەگەن ساياسي قاتەلىكتەرگە جول بەرىلمەس ەدى دەپ سانايدى.
ساياساتكەردىڭ ولىمىنە ناقتى كىم جاۋاپتى ەكەنى ءالى بەلگىسىز. الايدا ونىڭ جاقىندارى مەن جاقتاستارى بۇل ءىستىڭ تۇبىندە اشىلاتىنىنا سەنىمدى.
«بۇل – ساياسي تەررور. بىراق شىندىقتى جاسىرۋ مۇمكىن ەمەس. ۋاقىتى كەلگەندە، كىنالىلەر زاڭ الدىندا جاۋاپ بەرەدى»، – دەدى رىسبەك سارسەنبايۇلى.
