بۇۇ باس اسسامبلەياسىنىڭ 79-سەسسياسىندا «دۇنيەجۇزىلىك جىلقى كۇنى تۋرالى» رەزوليۋتسيا تالقىلانىپ، ءبىراۋىزدان قابىلدانعان. مەرەكە موڭعوليادا تويلانادى، دەپ حابارلايدى "ادىرنا" ۇلتتىق پورتالى مontsame اگەنتتىگىنە سىلتەپ.
اتالعان باستامانى موڭعوليا پرەزيدەنتى ۋحنااگين حۋرەلسۋح ۇسىنعان. سەسسيا 2025 جىلدىڭ 3 ماۋسىمىندا وتكەن.
رەزوليۋتسيادا ايتىلعانداي 2026 جىلى دۇنيەجۇزىلىك جىلقى كۇنىنە ارنالعان نەگىزگى ءىس-شارالاردى موڭعوليا قابىلدايدى. ەل اۋماعىندا وتەتىن مەرەكەلىك باعدارلامالارعا الەمنىڭ 56 ەلىنەن 10 مىڭعا جۋىق سالت اتتى قاتىسادى دەپ جوسپارلانىپ وتىر.
بۇل – حالىقارالىق دەڭگەيدە جىلقى مادەنيەتىن دارىپتەيتىن اۋقىمدى شارالاردىڭ ءبىرى بولماق.
ءىس-شارالار شەڭبەرىندە جىلقىمەن بايلانىستى بىرقاتار باعىتتار قامتىلادى. الدىن الا بەس نەگىزگى باعدارلاما بەلگىلەنگەنن ناقتىراق، ويىن-ساۋىق جانە مادەني ءىس-شارالار، يپپوتەراپيا، جىلقى كۇتىمى، اتقا ءمىنۋ مادەنيەتى، 21 ايماقتان جينالاتىن ءداستۇر مۇراگەرلەرىنىڭ ونەرى مەن تاجىريبەسى كورسەتىلەدى.
ايتا كەتەيىك، 2013 جىلى موڭعوليا 3 مىڭعا جۋىق جۇيرىك قاتىسقان ات جارىسىن جانە ۇلتتىق كيىمدەگى، ءداستۇرلى ەر-تۇرمان مەن جۇگەن تاققان 10 مىڭ سالت اتتىنىڭ شەرۋىن ۇيىمداستىرعان. بۇل شارالار گيننەستىڭ رەكوردتار كىتابىنا ەنۋ ماقساتىندا وتكىزىلگەن ەدى.
الەمدەگى جىلقى سانى بۇۇ مالىمەتتەرىنە قاراعاندا 60.8 ملن باستان اسادى. ونىڭ كوبى اقش-قا تيەسىلى. امەريكاداعى جىلقى سانى 10 ملن باستان اسادى دەپ شامالانادى. قازاقستان، موڭعوليا جانە قىتاي ەلدەرىنىڭ ارقايسىسىنداعى جىلقى سانى 3 ملن باستى قۇرايدى.
