Bıyl 11 aqpan kúni saıası jáne qoǵam qaıratkeri Altynbek Sársenbaevtyń qaza tapqanyna 19 jyl toldy. Osy qaraly datada qaıratkerdiń «Ýaqytynda aıtylǵan shyndyq» jáne «Alashtyń Altynbegi» atty eki tomdyq kitabynyń tusaýkeseri ótti, dep habarlaıdy "Adyrna" ulttyq portaly.
Altynbek Sársenbaev – táýelsiz Qazaqstan tarıhyndaǵy eń jas mınıstrlerdiń biri. Onyń kózqarastary men batyl málimdemeleri qoǵamda úlken rezonans týdyrdy. Jazýshy Marat Baıdildáulynyń aıtýynsha, Sársenbaev sol kezdegi prezıdent Nursultan Nazarbaevqa ashyq syn aıtyp, Rahat Álıev pen Darıǵa Nazarbaevanyń memleketti tolyqtaı basyp alý qaýpin alǵashqylardyń biri bolyp kótergen. Bul úshin ol qysymǵa ushyrap, aqyry saıası qastandyqtyń qurbanyna aınaldy.
Marqumnyń aǵasy, jýrnalıst Rysbek Sársenbaıuly saıasatkerdiń halyq múddesi úshin kúreskenin jáne onyń qazasy táýelsiz el tarıhyndaǵy eń úlken qasiretti oqıǵalardyń biri bolǵanyn atap ótti.
«Altynbekke atylǵan oq – halyqqa atylǵan oq» degen zııaly qaýym pikirin keltirgen ol, eger qaıratker tiri bolǵanda, elde kóptegen saıası qatelikterge jol berilmes edi dep sanaıdy.
Saıasatkerdiń ólimine naqty kim jaýapty ekeni áli belgisiz. Alaıda onyń jaqyndary men jaqtastary bul istiń túbinde ashylatynyna senimdi.
«Bul – saıası terror. Biraq shyndyqty jasyrý múmkin emes. Ýaqyty kelgende, kináliler zań aldynda jaýap beredi», – dedi Rysbek Sársenbaıuly.
