ەكس-مينيستر Facebook پاراقشاسىندا سوت بيلىگىنىڭ ارەكەتتەرىنە قارسى ەكەنىن جەتكىزىپ، اشتىق جاريالاعانىن جازعان بولاتىن. الايدا دەپارتامەنت اقپاراتتى جوققا شىعاردى، دەپ حابارلايدى "ادىرنا" ۇلتتىق پورتالى.
Facebook پاراقشاسىندا ورىس تىلىندە جازىلعان ارىز تاراعان. ول ءالى دە ەكس-ءمينيستردىڭ پاراقشاسىندا جاريالانىپ تۇر.
بۇل اقپاراتقا قاتىستى اقمولا وبلىسى بويىنشا قىلمىستىق اتقارۋ جۇيەسى دەپارتامەنتى پىكىر ءبىلدىردى. رەسمي حابارلامادا اشتىق جاريالاۋ تۋرالى اقپارات شىندىققا جاناسپايتىنى اتالعان.
"ول تاماق ءىشىپ جاتىر، بۇل بەينەباقىلاۋ كامەرالارى ارقىلى راستالعان. ودان ەشقانداي ارىز دا، شاعىم دا بولعان جوق. سونىمەن قاتار بەلگىلەنگەن تارتىپپەن سوتتالۋشى ۇيالى تەلەفون قولدانا المايدى. بۇل رەتتە ونىڭ اتىنا الەۋمەتتىك جەلىدە جاريالانعان جاريالانىم بويىنشا تەرگەۋ جۇرگىزىلىپ جاتىر”، – دەپ مالىمدەدى قىلمىستىق اتقارۋ جۇيەسى دەپارتامەنتىنىڭ ءباسپاسوز قىزمەتى.
دەپارتامەنت جالعان اقپارات ۇشىن جاۋاپكەرشىلىك قاراستىرىلعانىن ەسكەرتتى.
ال بۇگىن، 11 اقپان - سوتتالعان ءمينيستردىڭ تۋعان كۇنى. بۇگىن ول 62 جاسقا تولدى.
