ءماجىلىس دەپۋتاتى رينات زايىت كورىنەۋ جالعان اقپارات تاراتۋ ىستەرى بويىنشا سوتتالعان ازاماتتارعا امنيستيا جاريالاۋعا شاقىردى، دەپ حابارلايدى «ادىرنا» ءتىلشىسى.
«وكىنىشتى جاعداي بار. الەۋمەتتىك جەلىدەگى پىكىرلەرى ءۇشىن سوتتالعان ادامدار بار. مەن ارىپتەستەرىمنەن قىلمىستىق كودەكستىڭ 274-بابى بويىنشا سوتتالعان تۇلعالارعا امنيستيا قولدانۋعا كومەكتەسۋىن قاتاڭ تۇردە سۇرايمىن»، – دەدى دەپۋتات.
ول جۇمىس توبىنىڭ وتىرىستارىندا دەپۋتاتتار كوپتەگەن پىكىر ايتىپ، بىرقاتار ۇسىنىستار ەنگىزگەنىن، الايدا ولاردىڭ ۇكىمەت تاراپىنان قولداۋ تاپپاعانىن اتاپ ءوتتى.
ناۋرىز ايىندا قازاقستاندىق جۋرناليستەر توبى پرەزيدەنت قاسىم-جومارت توقاەۆقا كورىنەۋ جالعان اقپارات تاراتۋ تۋرالى باپتى قىلمىستىق سيپاتتان ارىلتۋ جونىندە ۇندەۋ جاساعان بولاتىن. سول كەزدە جۋرناليست بوتاگوز وماروۆاعا قاتىستى ءدال وسى باپ بويىنشا تەرگەۋ جۇرگىزىلگەن ەدى. كەيىن ول كىناسىن مويىنداپ، كەشىرىم سۇراعاننان كەيىن ءىس توقتاتىلدى.
8 ساۋىردە مادەنيەت جانە اقپارات مينيسترلىگى قىلمىستىق كودەكستىڭ 274-بابىن ءىشىنارا قىلمىستىق جاۋاپكەرشىلىكتەن شىعارۋ ماسەلەسىن قاراستىرىپ جاتقانىن حابارلاعان بولاتىن.
