اقتاۋ ماڭىندا اپاتقا ۇشىراعان Azerbaijan Airlines كومپانياسىنىڭ باكۋ – گروزنىي رەيسىنىڭ ۇشاعىنان تەسىپ وتكەن بوگدە زاتتار تابىلدى. 40 كۇننەن سوڭ اپاتتىڭ العاشقى ەسەبى جاريالاندى، دەپ حابارلايدى “ادىرنا” ۇلتتىق پورتالى.
«تەسىك تۇرىندەگى زاقىمداردىڭ كوبىسى فين مەن تۇراقتاندىرعىشتا ورنالاسقان. زاقىمداردى ۆيزۋالدى تەكسەرۋ ناتيجەسىندە ولاردىڭ كەيبىرەۋلەرى تولىق ءوتىپ كەتكەنى، ال كەيبىرەۋلەرى تەك بىتەلگەن/تولىق ەمەس زاقىمدار ەكەنى بايقالدى. (…) سىرتقى زاتتارمەن بولعان تەسىك تۇرىندەگى زاقىمداردىڭ تابيعاتى مەن شىعۋ تەگىن انىقتاۋ ءۇشىن قاجەتتى زەرتتەۋلەر مەن ساراپتامالار جۇرگىزىلەدى»، – دەلىنگەن الدىن الا اپاتتىڭ تەرگەۋ ناتيجەلەرىندە.
Azerbaijan Airlines اۋە كومپانياسىنىڭ Embraer-190 ۇشاعىمەن بولعان وقيعانى تەرگەۋ تۋرالى الدىن الا ەسەپ قازاقستان رەسپۋبليكاسى كولىك مينيسترلىگىنىڭ رەسمي سايتىندا جاريالاندى.
Azerbaijan Airlines اۋە كومپانياسىنىڭ Embraer-190 ۇشاعىمەن بولعان وقيعانى تەرگەۋ تۋرالى الدىن الا ەسەپ مالىمەتىنشە "كىلەم" جوسپارىنىڭ ەنگىزىلگەنى جانە اۋە كەمەگە قۇستاردىڭ سوعىلعانى تۋرالى حابارلايدى.
ەسكە سالا كەتەيىك، قايعىلى وقيعا 2024 جىلى 25 جەلتوقسان كۇنى بولعان ەدى. بۇل تراگەديانىڭ سالدارىنان ۇشاقتىڭ كاپيتانى يگور كشنياكين، ەكىنشى پيلوت الەكساندر كاليانينوۆ جانە اعا بورتسەرىك حاكيما اليەۆامەن قاتار 38 ادام قازا تاپقان بولاتىن. ولارعا ازەربايجاننىڭ ۇلتتىق قاھارمانى اتاعى بەرىلدى.
كەلەسى كۇنى، 26 جەلتوقساندا باستاپقى مالىمەت بويىنشا ۇشاق رەسەيدىڭ «پانتسير-س1» اۋە قورعانىس جۇيەسى ارقىلى اتىپ تۇسىرىلگەنىن حابارلانعان بولاتىن. كەيىنىرەك رەسەي تاراپى تراگەديانىڭ سەبەپتەرىن بۇلىڭعىرلاتۋعا تىرىسىپ، ءتۇرلى بولجامدار ۇسىندى.
بولجام بويىنشا، گروزنىي اۋە كەڭىستىگىندە ۇشاق رەسەيلىك اۋە قورعانىس جۇيەسىنىڭ شابۋىلىنا ۇشىراعاننان كەيىن باعىتىن وزگەرتۋگە ءماجبۇر بولعان، وسىلايشا قازاقستانعا جەتىپ اپاتقا ۇشىراعان.
27 جەلتوقساندا روساۆياتسيا بپلا-عا (ۇشقىشسىز ۇشاقتارعا) قارسى ءىس-شارالار جۇرگىزۋ جوسپارى بويىنشا جۇمىس جۇرگىزىلگەنىن راستادى. 27 جەلتوقساندا Azerbaijan Airlines اپاتتىڭ سەبەبىن «فيزيكالىق جانە تەحنيكالىق كەدەرگىلەر» دەپ اتادى.
ازەربايجان پرەزيدەنتى يلحام اليەۆ اپاتقا رەسەي وكىلدەرى كىنالى دەپ مالىمدەپ، ماسكەۋ وتەماقى تولەۋى كەرەك دەگەن تالاپ قويدى.
كەيىن رەسەي پرەزيدەنتى ۆلاديمير پۋتين اليەۆكە ۇشاق «رەسەيدىڭ اۋە كەڭىستىگىندە اپاتقا ۇشىراعانى ءۇشىن» كەشىرىم سۇرادى. رەسەي بيلىگى ازەربايجان ۇشاعى گروزنىيعا قونباق بولعان كەزدە ۋكراينالىق دروندارعا بايلانىستى قالا توبەسىندە اۋە قورعانىس جۇيەسى ىسكە قوسىلىپ تۇرعانىن مويىنداعان.
كەيىن ازەربايجان ۇشاعىنىڭ اپاتقا ۇشىراۋىنىڭ تەرگەۋ قورىتىندىلارىن كۇتىپ وتىرعاندا رەسەي تاراپى كىنالىلەردى جازالاۋدان گورى، ماسەلەنى ماعىناسىز تالاسقا بۇرۋعا تىرىسقانىن حابارلادىق.
اتالعان داۋدىڭ باسى رەسەي سىرتقى ىستەر ءمينيسترى سەرگەي لاۆروۆتىڭ «قارا جاشىكتەردەن» الىنعان دەرەكتەر «مەديا كەڭىستىكتە تاراعان اقپاراتتى راستامايدى» دەگەن مالىمدەمەسىنەن باستالعان بولاتىن. ال قازاقستان ۆيتسە-پرەمەرى قانات بوزىمباەۆ شىنايى دەرەكتىڭ تارالىپ كەتكەن مالىمەتتەن ايىرماسى بارىن ايتقان. ونىڭ ايتۋىنشا، برازيليادا اشىلىپ وقىلعان قارا جاشىك مالىمەتتەرى زەرتتەلىپ، وتكەن اپتادا الدىن-الا قورتىندىسى جاريالانۋى كەرەك بولاتىن.
