Aqtaý mańynda apatqa ushyraǵan Azerbaijan Airlines kompanııasynyń Baký – Groznyı reısiniń ushaǵynan tesip ótken bógde zattar tabyldy. 40 kúnnen soń apattyń alǵashqy esebi jarııalandy, dep habarlaıdy “Adyrna” ulttyq portaly.
«Tesik túrindegi zaqymdardyń kóbisi fın men turaqtandyrǵyshta ornalasqan. Zaqymdardy vızýaldy tekserý nátıjesinde olardyń keıbireýleri tolyq ótip ketkeni, al keıbireýleri tek bitelgen/tolyq emes zaqymdar ekeni baıqaldy. (…) Syrtqy zattarmen bolǵan tesik túrindegi zaqymdardyń tabıǵaty men shyǵý tegin anyqtaý úshin qajetti zertteýler men saraptamalar júrgiziledi», – delingen aldyn ala apattyń tergeý nátıjelerinde.
Azerbaijan Airlines áýe kompanııasynyń Embraer-190 ushaǵymen bolǵan oqıǵany tergeý týraly aldyn ala esep Qazaqstan Respýblıkasy Kólik mınıstrliginiń resmı saıtynda jarııalandy.
Azerbaijan Airlines áýe kompanııasynyń Embraer-190 ushaǵymen bolǵan oqıǵany tergeý týraly aldyn ala esep málimetinshe "Kilem" josparynyń engizilgeni jáne áýe kemege qustardyń soǵylǵany týraly habarlaıdy.
Eske sala keteıik, qaıǵyly oqıǵa 2024 jyly 25 jeltoqsan kúni bolǵan edi. Bul tragedııanyń saldarynan ushaqtyń kapıtany Igor Kshnıakın, ekinshi pılot Aleksandr Kalıanınov jáne aǵa bortserik Hákıma Álıevamen qatar 38 adam qaza tapqan bolatyn. Olarǵa Ázerbaıjannyń ulttyq qaharmany ataǵy berildi.
Kelesi kúni, 26 jeltoqsanda bastapqy málimet boıynsha ushaq Reseıdiń «Panır-S1» áýe qorǵanys júıesi arqyly atyp túsirilgenin habarlanǵan bolatyn. Keıinirek Reseı tarapy tragedııanyń sebepterin bulyńǵyrlatýǵa tyrysyp, túrli boljamdar usyndy.
Boljam boıynsha, Groznyı áýe keńistiginde ushaq reseılik áýe qorǵanys júıesiniń shabýylyna ushyraǵannan keıin baǵytyn ózgertýge májbúr bolǵan, osylaısha Qazaqstanǵa jetip apatqa ushyraǵan.
27 jeltoqsanda Rosavıaııa BPLA-ǵa (ushqyshsyz ushaqtarǵa) qarsy is-sharalar júrgizý jospary boıynsha jumys júrgizilgenin rastady. 27 jeltoqsanda Azerbaijan Airlines apattyń sebebin «fızıkalyq jáne tehnıkalyq kedergiler» dep atady.
Ázerbaıjan prezıdenti Ilham Álıev apatqa Reseı ókilderi kináli dep málimdep, Máskeý ótemaqy tóleýi kerek degen talap qoıdy.
Keıin Reseı prezıdenti Vladımır Pýtın Álıevke ushaq «Reseıdiń áýe keńistiginde apatqa ushyraǵany úshin» keshirim surady. Reseı bıligi Ázerbaıjan ushaǵy Groznyıǵa qonbaq bolǵan kezde ýkraınalyq drondarǵa baılanysty qala tóbesinde áýe qorǵanys júıesi iske qosylyp turǵanyn moıyndaǵan.
Keıin Ázerbaıjan ushaǵynyń apatqa ushyraýynyń tergeý qorytyndylaryn kútip otyrǵanda Reseı tarapy kinálilerdi jazalaýdan góri, máseleni maǵynasyz talasqa burýǵa tyrysqanyn habarladyq.
Atalǵan daýdyń basy Reseı syrtqy ister mınıstri Sergeı Lavrovtyń «qara jáshikterden» alynǵan derekter «medıa keńistikte taraǵan aqparatty rastamaıdy» degen málimdemesinen bastalǵan bolatyn. Al Qazaqstan vıe-premeri Qanat Bozymbaev shynaıy derektiń taralyp ketken málimetten aıyrmasy baryn aıtqan. Onyń aıtýynsha, Brazılııada ashylyp oqylǵan qara jáshik málimetteri zerttelip, ótken aptada aldyn-ala qortyndysy jarııalanýy kerek bolatyn.
