مىسىققا قاتىگەزدىك جاساعانى ءۇشىن اقتاۋ تۇرعىنى سوتتا 100 ساعات قوعامدىق جۇمىسقا تارتىلدى، دەپ حابارلايدى «ادىرنا» ۇلتتىق پورتالى.
Stan.kz اقپارات اگەنتتىگىنىڭ مالىمەتىنشە، 2023 جىلعى 12 قازاندا اقتاۋ قالالىق سوتىندا جانۋارعا قاتىگەزدىك كورسەتىپ، ونىڭ ولىمىنە اكەپ سوققان ا.-عا قاتىستى قازاقستان رەسپۋبليكاسى قك-ءنىڭ 316-بابىنىڭ 2-بولىگىمەن قىلمىستىق ءىس قارالعان.
سوت انىقتاعانداي، 2023 جىلدىڭ 18 قىركۇيەگىندە شامامەن ساعات 21:10-دا سوتتالۋشى مىسىقتىڭ باسىنان جانە دەنەسىنەن شۆابرامەن ۇرعان. سودان كەيىن ول جانۋاردى ءۇيدىڭ الدىنا تاستاپ كەتكەن. سوتتالۋشىنىڭ زاڭسىز ارەكەتىنىڭ سالدارىنان مىسىق ءولىپ قالعان.
پروكۋرور سوتتالۋشىنى 100 ساعات قوعامدىق جۇمىسقا تارتۋدى سۇرادى. ايىپتالۋشى ءوز كىناسىن تولىق مويىندادى.
«جانۋارعا قاتىگەزدىكپەن قاراۋ، ونىڭ ولىمىنە اكەپ سوققانى ءۇشىن 200 اەك-كە دەيىنگى مولشەردە ايىپپۇل سالۋدى، نە 200 ساعاتقا دەيىن قوعامدىق جۇمىسقا تارتۋ نەمەسە 50 تاۋلىككە دەيىنگى مەرزىمگە قاماۋعا الۋدى كوزدەيدى»، – دەلىنگەن حابارلامادا.
سوتتالۋشىنىڭ كىناسى ودان جاۋاپ الۋ حاتتاماسىمەن، سونداي-اق كۋاگەردىڭ ايعاقتارىمەن جانە مال دارىگەرىنىڭ قورىتىندىسىمەن دالەلدەندى.
جاۋاپكەرشىلىك پەن جازانى اۋىرلاتاتىن ءمان-جايلار انىقتالعان جوق.
«سوت ۇكىمىمەن سوتتالۋشى قازاقستان رەسپۋبليكاسى قىلمىستىق كودەكسىنىڭ 316-بابىنىڭ 2-بولىگىندە كوزدەلگەن قىلمىستى جاساعانى ءۇشىن كىنالى دەپ تانىلىپ، وعان 100 ساعات مەرزىمگە قوعامدىق جۇمىستارعا تارتۋ تۇرىندەگى جازا تاعايىندالدى. ۇكىم زاڭدى كۇشىنە ەنگەن جوق»، – دەپ حابارلادى سوتتىڭ ءباسپاسوز قىزمەتى.
«ادىرنا» ۇلتتىق پورتالى
