Qyzylorda qalasyn ystyq sýmen qamtamasyz etý jobasy sátti júzege asyrylýda. Búginde 187 úı ystyq sýǵa qosyldy. Kelesi jylý berý maýsymyna deıin oblys ortalyǵynyń kópqabatty turǵyn úıleriniń barlyǵyna ystyq sý beriledi. Bul týraly Qyzylorda oblysy ákiminiń baspasóz qyzmeti málimdedi, dep habarlaıdy “Adyrna” ulttyq portaly.
Bul týraly Memleket basshysy Qasym-Jomart Toqaevtyń tóraǵalyǵymen ótken Úkimettiń keńeıtilgen otyrysynda oblys ákimi Nurlybek Nálibaev atap ótti.
Memleket basshysynyń qoldaýymen aımaqta mańyzdy jobalar júzege asýda. Túrkııalyq ınvestor «Aksa Enerdjı» kompanııasy qolǵa alǵan qýaty 240 megavattyq jańa jylý-elektr ortalyǵy qurylysynyń 70 paıyzy aıaqtaldy. Nysan qyrkúıek aıynda paıdalanýǵa beriledi. Jańa stanııa oblys ortalyǵyn jylýmen, aımaqty elektr energııasymen tolyq qamtamasyz etedi. Óndirilgen elektr energııasynyń artylǵan bóligin ózge óńirlerge satýǵa múmkindik beredi.
«Qyzylorda-Jezqazǵan» avtomobıl jolyn qaıta jańǵyrtý jumystary 2022 jyly bastaý alǵany belgili. Respýblıkalyq mańyzy bar joldyń oblys aýmaǵyndaǵy 216 shaqyrymynyń 151 shaqyrymy paıdalanýǵa berildi. Joba bıyl tolyq aıaqtalady.
Sondaı-aq, Qyzylorda qalasynan Aqtóbe oblysynyń shekarasyna deıingi 566 shaqyrym joldy I sanatqa aýystyrý osy jyly bastalady. Qazirgi tańda, demeýshilikpen 350 mln teńgege tehnıka-ekonomıkalyq negizdemesi ázirlendi.
