قازاقستاندا العاش رەت پويىز جولاۋشىلارىنا ساپار بارىسىندا ينتەرنەت قولدانۋ مۇمكىندىگى بەرىلدى، دەپ حابارلايدى "ادىرنا" ۇلتتىق پورتالى «جولاۋشىلار تاسىمالى» اق ءباسپاسوز قىزمەتىنە سىلتەمە جاساپ.
№3/4 «استانا-الماتى» باعىتىنداعى پويىزدىڭ العاشقى رەيسىندە 500 جولاۋشى سپۋتنيكتىك تەحنولوگيالار ارقىلى ينتەرنەتتى پايدالانىپ ۇلگەردى.
«ساپار بارىسىندا جولاۋشىلار WhatsApp ارقىلى حابار الماسىپ، YouTube-تان بەينەلەر كورىپ، باسقا دا تانىمال ينتەرنەت سەرۆيستەرىن قولدانا الادى. الايدا، توررەنتتەر مەن اعىندى جۇكتەۋ سايتتارىنا قولجەتىمدىلىك شەكتەلگەن. لوكوموتيۆكە ورناتىلعان زاماناۋي سپۋتنيكتىك جابدىق بۇكىل مارشرۋت بويى تۇراقتى ءارى جوعارى جىلدامدىقتاعى ينتەرنەتپەن قامتاماسىز ەتەدى» – دەلىنگەن حابارلامادا.
بۇل جاڭاشىلدىق جولاۋشىلارعا ساپار بارىسىندا بايلانىستا بولۋعا، جۇمىس ىستەۋگە جانە دەمالۋعا مۇمكىندىك بەرەدى. الداعى ۋاقىتتا «تالگو» پويىزدارىنىڭ بارلىق 15 باعىتىنا عالامتور قىزمەتىن ەنگىزۋ جوسپارلانىپ وتىر.
«پويىزداردا عالامتوردى ەنگىزۋ – جولاۋشىلار تاسىمالىن دامىتۋداعى ماڭىزدى قادام. ءبىز ساياحاتتاردى زاماناۋي تالاپتارعا ساي ۇيىمداستىرىپ، اقپارات پەن بايلانىسقا قولجەتىمدىلىكتى تولىق قامتاماسىز ەتۋگە باعىتتالعان جۇمىستاردى جۇزەگە اسىرۋدامىز»، – دەپ مالىمدەدى «جولاۋشىلار تاسىمالى» اق باسقارما توراعاسى ءانۋار احمەتجانوۆ.
