بارسەلونا ماڭىندا پويىز رەلستەن شىعىپ كەتىپ، اپاتقا ۇشىرادى. سالدارىنان ماشينيست قازا تاۋىپ، 37 ادام جاراقات الدى، دەپ حابارلايدى «ادىرنا» ءتىلشىسى DW-گە سىلتەمە جاساپ.
قايعىلى وقيعا 20 قاڭتار كۇنى كەشكە بارسەلونادان شامامەن 40 شاقىرىم باتىستا ورنالاسقان جەليدا قالاسىنىڭ ماڭىندا بولعان. كاتالونيا ءورت ءسوندىرۋ قىزمەتىنىڭ وكىلى كلاۋدي گالياردونىڭ حابارلاۋىنشا، قالا ماڭىنداعى پويىز ۆاگونىنا تىرەۋ قابىرعاسى قۇلاعان.
كاتالونيانىڭ قالا ماڭىنداعى پويىزدارىن باسقاراتىن Rodalies de Catalunya كومپانياسىنىڭ مالىمەتىنشە، قازا بولعان ادام – وسى كومپانيانىڭ قىزمەتكەرى.
قازىرگى تاڭدا جەرگىلىكتى پويىزداردىڭ قوزعالىسى توقتاتىلدى. وقيعانىڭ ءمان-جايى انىقتالىپ جاتىر.
ايتا كەتەيىك، بۇل تەمىرجول وقيعاسى يسپانيانىڭ وڭتۇستىگىندە كەمىندە 42 ادامنىڭ ءومىرىن قيعان ءىرى تەمىرجول اپاتىنان كەيىن بار-جوعى ەكى كۇن وتكەن سوڭ تىركەلىپ وتىر. بۇعان دەيىن كوردوۆا پروۆينتسياسىندا ەكى جۇردەك پويىزدىڭ سوقتىعىسقانىن جازعان ەدىك.
