Qazaqstanda alǵash ret poıyz jolaýshylaryna sapar barysynda ınternet qoldaný múmkindigi berildi, dep habarlaıdy "Adyrna" ulttyq portaly «Jolaýshylar tasymaly» AQ baspasóz qyzmetine silteme jasap.
№3/4 «Astana-Almaty» baǵytyndaǵy poıyzdyń alǵashqy reısinde 500 jolaýshy spýtnıktik tehnologııalar arqyly ınternetti paıdalanyp úlgerdi.
«Sapar barysynda jolaýshylar WhatsApp arqyly habar almasyp, YouTube-tan beıneler kórip, basqa da tanymal ınternet servısterin qoldana alady. Alaıda, torrentter men aǵyndy júkteý saıttaryna qoljetimdilik shektelgen. Lokomotıvke ornatylǵan zamanaýı spýtnıktik jabdyq búkil marshrýt boıy turaqty ári joǵary jyldamdyqtaǵy ınternetpen qamtamasyz etedi» – delingen habarlamada.
Bul jańashyldyq jolaýshylarǵa sapar barysynda baılanysta bolýǵa, jumys isteýge jáne demalýǵa múmkindik beredi. Aldaǵy ýaqytta «Talgo» poıyzdarynyń barlyq 15 baǵytyna ǵalamtor qyzmetin engizý josparlanyp otyr.
«Poıyzdarda ǵalamtordy engizý – jolaýshylar tasymalyn damytýdaǵy mańyzdy qadam. Biz saıahattardy zamanaýı talaptarǵa saı uıymdastyryp, aqparat pen baılanysqa qoljetimdilikti tolyq qamtamasyz etýge baǵyttalǵan jumystardy júzege asyrýdamyz», – dep málimdedi «Jolaýshylar tasymaly» AQ Basqarma tóraǵasy Ánýar Ahmetjanov.
