Qazaqstanda alǧaş ret poiyz jolauşylaryna sapar barysynda internet qoldanu mümkındıgı berıldı, dep habarlaidy "Adyrna" ūlttyq portaly «Jolauşylar tasymaly» AQ baspasöz qyzmetıne sılteme jasap.
№3/4 «Astana-Almaty» baǧytyndaǧy poiyzdyŋ alǧaşqy reisınde 500 jolauşy sputniktık tehnologiialar arqyly internettı paidalanyp ülgerdı.
«Sapar barysynda jolauşylar WhatsApp arqyly habar almasyp, YouTube-tan beineler körıp, basqa da tanymal internet servisterın qoldana alady. Alaida, torrentter men aǧyndy jükteu saittaryna qoljetımdılık şektelgen. Lokomotivke ornatylǧan zamanaui sputniktık jabdyq bükıl marşrut boiy tūraqty ärı joǧary jyldamdyqtaǧy internetpen qamtamasyz etedı» – delıngen habarlamada.
Būl jaŋaşyldyq jolauşylarǧa sapar barysynda bailanysta boluǧa, jūmys ısteuge jäne demaluǧa mümkındık beredı. Aldaǧy uaqytta «Talgo» poiyzdarynyŋ barlyq 15 baǧytyna ǧalamtor qyzmetın engızu josparlanyp otyr.
«Poiyzdarda ǧalamtordy engızu – jolauşylar tasymalyn damytudaǧy maŋyzdy qadam. Bız saiahattardy zamanaui talaptarǧa sai ūiymdastyryp, aqparat pen bailanysqa qoljetımdılıktı tolyq qamtamasyz etuge baǧyttalǧan jūmystardy jüzege asyrudamyz», – dep mälımdedı «Jolauşylar tasymaly» AQ Basqarma töraǧasy Änuar Ahmetjanov.
Ūqsas jaŋalyqtar
