قىتايدىڭ تانشان قالاسىندا ورنالاسقان «CRRC Tangshan Co.، Ltd» زاۋىتىنان استانا قالاسىنا ارنالعان جەڭىل رەلستى كولىك (LRT) جوباسىنا قاجەتتى العاشقى ەكى ۆاگون جونەلتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى «City Transportation Systems» جشس مالىمدەدى.
جونەلتۋ راسىمىنە قازاقستان تاراپىنان «City Transportation Systems» باسقارما توراعاسى اسىلبەك دۇيسەباەۆ، ال قىتاي تاراپىنان ۆاگونداردى ءوندىرۋشى زاۋىتتىڭ باسقارما توراعاسى چجوۋ تسيۋننيان مەن باس مەردىگەر CRAEC كومپانياسىنىڭ باس ديرەكتورى چجوۋ حايۆەي قاتىستى.
تانشان قالاسىنداعى زاۋىتتا بارلىعى 19 زاماناۋي، ءتورت سەكتسيالى، جۇرگىزۋشىسىز جۇرەتىن LRT ۆاگونى وندىرىلەدى. بۇل قۇرامدار اۆتوماتتاندىرۋدىڭ ءتورتىنشى دەڭگەيىنە يە جانە ءاربىرى 650 جولاۋشىعا ەسەپتەلگەن. اتالعان ۆاگوندار 1881 جىلى قۇرىلعان قىتاي تەمىرجول وندىرىسىندەگى ەڭ كونە جانە ءىرى كاسىپورىنداردىڭ ءبىرى – «CRRC Tangshan» بازاسىندا جاسالۋدا.
«استاناعا العاشقى ەكى ۆاگون ماۋسىم ايىندا جەتكىزىلەدى. قالعان 17 قۇرام وسى جىلدىڭ سوڭىنا دەيىن جەتكىزىلەدى. جەلى بويىنشا العاشقى سىناقتاردى قىركۇيەك ايىندا باستاۋ جوسپارلانىپ وتىر»، – دەلىنگەن «City Transportation Systems» تاراتقان رەسمي حابارلامادا.
قازىرگى ۋاقىتتا استاناداعى LRT جوباسى اياسىندا قۇرىلىس جۇمىستارى قارقىندى ءجۇرىپ جاتىر. جول توسەۋ، ستانتسيا قاسبەتتەرىن مونتاجداۋ، ەستاكادا تىرەكتەرى مەن ارقالىقتارىن سىرلاۋ، سىرتقى ينجەنەرلىك جەلىلەردى قوسۋ، ەستاكادا استىن اباتتاندىرۋ جانە دەپو قۇرىلىسى جالعاسۋدا.
ۇقساس جاڭالىقتار
