ەندى پويىز جولاۋشىلارى ارتىق جۇك ءۇشىن قوسىمشا اقى تولەيدى

قازاقستاندا پويىز جولاۋشىلارى قول جۇگىنىڭ ارتىق سالماعى ءۇشىن قوسىمشا تولەم جاسايتىن بولادى، دەپ حابارلايدى «ادىرنا» ءتىلشىسى.

«قازاقستان تەمىر جولى» بەكىتكەن جاڭا ەرەجەگە سايكەس، «تالگو» ۆاگوندارىنا كىرەردە قول جۇگىنىڭ سالماعى 25 كەلىدەن، ال ءۇش جاقتى كولەمى (بيىكتىگى، ۇزىندىعى جانە ەنى) 150 سانتيمەتردەن اسپاۋى ءتيىس.

قالعان پويىزداردا قول جۇگىنىڭ سالماعى 35 كەلىدەن، كولەمى 200 سانتيمەتردەن اسپاۋى كەرەك. بەلگىلەنگەن مولشەردەن اسقان جاعدايدا، ءار ارتىق كەلىگە 60 تەڭگەدەن اقى الىنادى. بۇل تولەم جولدىڭ ۇزاقتىعىنا بايلانىستى ەسەپتەلمەك. قول جۇكتىڭ سالماعىن باقىلاۋ جولسەرىكتەردىڭ مىندەتىنە جۇكتەلگەن.

«ەگەر جولاۋشى مەن جولسەرىك اراسىندا داۋ تۋىنداسا، قول جۇكتى تارازىمەن تەكسەرۋدى پويىز باستىعى ۇيىمداستىرادى. ارتىق سالماق راستالسا، قوسىمشا تاريف بويىنشا تولەم جاسالادى. وسىدان كەيىن رەسمي قۇجات راسىمدەلىپ، جولاۋشى تولەمدى سوعان سايكەس تولەيدى. جۇك مىندەتتى تۇردە جولاۋشى وتىرعان پويىزبەن جونەلتىلەدى»،—دەپ ءتۇسىندىردى «جولاۋشىلار تاسىمالى» اق ءباسپاسوز قىزمەتىنىڭ PR مەنەدجەرى سارا ساحىنبەك.

ماماندار بۇل جاڭاشىلدىق جولاۋشىلارعا ۆاگون ىشىندە جايلى ءارى قاۋىپسىز جاعداي جاساۋ ءۇشىن قولعا الىنعانىن اتاپ ءوتتى.