17 قاڭتاردا موڭعوليا ۇكىمەتى مەن فرانتسۋزدىق «ورانو ماينينگ» كومپانياسى بىرلەسىپ ۋران ءوندىرۋ كەلىسىمىنە قول قويدى. بۇل تۋرالى موڭعوليا ۇكىمەتىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
جوبا اياسىندا 68,9 مىڭ توننا ۋران ءوندىرۋ جوسپارلانىپ وتىر. كەلىسسوز بارىسىندا فرانتسۋز تاراپى جالپى سوماسى 1,6 ملرد دوللار ينۆەستيتسيا سالۋعا نيەتتى ەكەنىن جەتكىزدى.
موڭعوليا پرەمەر-ءمينيسترى ويۋن-ەردەن بۇل قۇجات ەلدىڭ «ءۇشىنشى كورشىسىمەن» جاسالعان ەكىنشى ءىرى ينۆەستيتسيالىق كەلىسىمشارت ەكەنىن اتاپ ءوتتى.
«بۇل شارتتى جاساسۋ قوعام مەن ەكونوميكاعا عانا ەمەس، شەتەلدىك ينۆەستيتسيالاردىڭ، مەملەكەتتىك جانە وڭىرلىك بيۋدجەتتەردىڭ كولەمىن ۇلعايتۋعا، كوپتەگەن جۇمىس ورنىن قۇرۋعا، جاڭا تەحنولوگيالاردى ەنگىزۋگە جانە حالىقارالىق ىنتىماقتاستىقتى كەڭەيتۋگە تىكەلەي اسەر ەتەدى»،—دەدى ول.
ايتا كەتەيىك، موڭعوليا جوبادان شامامەن 5 ملرد دوللار تابادى دەپ كۇتىلۋدە. 44 ميلليون دوللار جەرگىلىكتى تۇرعىنداردى، ءبىلىم بەرۋ، دەنساۋلىق ساقتاۋ جانە الەۋمەتتىك دامۋدى قولداۋعا ارنالعان جەرگىلىكتى دامۋ قورىنا تىكەلەي اۋدارىلماق.
