26 تامىزدا «شىڭعىسحان» حالىقارالىق اۋەجايىندا «پرەزيدەنتتىك ستيپەنديا – 2100» باعدارلاماسى اياسىندا شەتەلدىك جوعارى وقۋ ورىندارىندا ءبىلىم الۋعا اتتانعان ستۋدەنتتەردى شىعارىپ سالۋ ءراسىمى ءوتتى. بۇل تۋرالى «مونتسامە» جازدى، دەپ حابارلايدى «ادىرنا» ءتىلشىسى.
موڭعوليا پرەزيدەنتى ۋحنااگين حۋرەلسۋح ستۋدەنتتەردى اۋەجايدان شىعارىپ سالىپ، ولارعا وقۋدا ساتتىلىك تىلەدى. سونداي-اق ءار ستۋدەنتكە ەستەلىك رەتىندە مەملەكەتتىك تۋ تابىستادى.
«الەمدىك دەڭگەيدەگى ءبىلىم الىپ، ەلىمىزدىڭ دامۋى مەن وركەندەۋىنە، بولاشاعىنىڭ جارقىن بولۋىنا ايانباي ەڭبەك ەتەتىن زيالى ءارى كوشباسشى ازامات بولۋلارىڭىزعا تىلەكتەسپىن. ەل، حالىق جانە ۇكىمەت بولاشاق ۇرپاققا سەنەدى. ەلىمىزدىڭ ابىرويى مەن موڭعول حالقىنىڭ قۇندىلىقتارىن جوعارى باعالاپ، ءبىر-ءبىرىمىزدى قولداپ، قۇرمەتتەپ، ءاردايىم ءوزارا دەمەۋ بولايىق»، – دەدى ول شىعارىپ سالۋ راسىمىندە.
بيىل 300 ستۋدەنت 16 ەلدىڭ ۋنيۆەرسيتەتتەرىندە ءبىلىم الۋعا اتتانادى. ولار اقش، گەرمانيا، فرانتسيا، چەحيا، كانادا، پولشا، اۋستراليا، جاپونيا، قىتاي، رەسەي، وڭتۇستىك كورەيا، تۇركيا، ۆەنگريا، ليتۆا، اۋستريا جانە ءۇندىستاندا وقيدى.
