QazNews24 ساتيرالىق پاراقشاسىنىڭ اۆتورى تەمىرلان ەڭسەبەكتىڭ ءۇيىن پوليتسيا تاعى دا تىنتۋدە. بۇل تۋرالى Oyan, Qazaqstan قوزعالىسىنىڭ بەلسەندىلەرى جاريالادى، دەپ حابارلايدى “ادىرنا” ۇلتتىق پورتالى.
«شۇعىل! قازىرگى ۋاقىتتا قازNews24 ساتيرالىق قوعامىنىڭ اۆتورى تەمىرلان ەڭسەبەكتىڭ ۇيىندە ءتىنتۋ جۇرگىزىلۋدە. الدىن الا مالىمەت بويىنشا وعان 174-باپ (الەۋمەتتىك، ۇلتتىق، رۋلىق، راسالىق، سوسلوۆيالىق نەمەسە ءدىني ارازدىقتى قوزدىرۋ) بويىنشا ايىپ تاعىلۋى مۇمكىن»،دەلىنگەن قوزعالىستىڭ حابارلاماسىندا.
ايتا كەتەيىك، ەگەر Oyan, Qazaqstan قوزعالىسىنىڭ مالىمەتى راس بولسا، بۇل ساتيراشىنىڭ العاشقى ءتىنتۋى ەمەس. 2021 جىلدىڭ 15 مامىرىندا پوليتسيا ەڭسەبەككە تەرگەۋ جاساعان بولاتىن. ول كەزدە قىلمىستىق كودەكستىڭ 274-بابىنىڭ 2-بولىگى (قوعام مەن مەملەكەتتىڭ زاڭمەن قورعالاتىن مۇددەلەرىنە نەمەسە ازاماتتاردىڭ قۇقىقتارىنا جانە زاڭدى مۇددەلەرىنە ەلەۋلى زيان كەلتىرۋ قاۋپىن تۋعىزاتىن جالعان اقپارات تاراتۋ) بويىنشا تەرگەۋ باستالعان. بۇل جاعدايدا ەڭسەبەك ءوزىنىڭ پاراقشاسى تۋرالى سيپاتتاماسىندا جاريالانعان اقپاراتتىڭ فەيك جاڭالىقتار مەن يۋمور، ساتيرالىق كونتەنت ەكەنىن جانە «ادامدار مەن وقيعالاردىڭ ۇقساستىعى كەزدەيسوق ەكەنىن» ناقتى جازعان.
17 مامىردا حالىقارالىق ءسوز بوستاندىعىن قورعاۋ ۇيىمى «ءادىل ءسوز» جاعدايعا تۇسىنىكتەمە بەرە وتىرىپ، قر قىلمىستىق كودەكسىنىڭ 274-بابىنىڭ ساتيرا مەن يۋمورعا قاتىسى جوق ەكەنىن اتاپ ءوتىپ، پوليتسيا قىزمەتكەرلەرىنىڭ قازاقستان كونستيتۋتسياسىن دۇرىس بىلمەيتىنىن ءبىلدىردى.
18 مامىردا بەدەلدى حالىقارالىق قۇقىق قورعاۋشى ۇيىم «شەكاراسىز رەپورتەرلەر» قازاقستان بيلىگىنەن ءسوز بوستاندىعىن قۇرمەتتەۋدى سۇراپ، يۋموردىڭ قىلمىس ەمەس ەكەنىن ەرەكشە اتاپ ءوتتى.
2021 جىلدىڭ 20 مامىرىندا حالىقارالىق قۇقىق قورعاۋشى ۇيىم Human Rights Watch ەڭسەبەككە قارسى ءىستى توقتاتۋدى تالاپ ەتىپ، قازاقستان بيلىگىنىڭ ازىلدەردى تۇسىنبەيتىنىن مالىمدەدى.
ايتا كەتۋ كەرەك، حالىقارالىق ۇكىمەتتىك ەمەس ۇيىم Amnesty International كەيىنىرەك ەڭسەبەكتىڭ ءىسىن فەيك جاڭالىقتار تۋرالى قازاقستان زاڭىن تالداۋ كەزىندە مىسال رەتىندە كەلتىرگەن.
